Deklarata e plotë e deputetes Mesila Doda pas gjetjes si antikushtetues nga Komisioni i Sigurisë te projekt-ligjit për heqjen e medaljeve të ish-eksponentëve të diktaturës komuniste.
Në një akt të paprecedent për parlamentarizmin shqiptar, me dt 09 shkurt trimat, hetuesit, ish-komunistët dhe ish-sigurimsat e Komisionit të Sigurisë morrën në shqyrtim pa praninë dhe pa lajmërimin e iniciatorëve të ligjit për medaljet, për ndryshimin e ligjit për medaljet dhe titujt e nderit. Paralelisht me këtë draft dhe shumë i ngjashem me të u depozitua edhe ligji i deputetëve Taulant Balla dhe Edi Rama, i cili duke mos pasur kohë dhe në urgjencë të panevojshme e depozitoi ligjin si deputet i thjeshtë dhe jo si kryeministër.
Megjithatë, akti i Komisionit të Sigurisë lë pa fjalë këdo që ka marrë pjesë në jetën parlamentare shqiptare përgjatë këtij çerek shekulli, pasi nuk pranon ta shqyrtojë dhe e kthen për mendim tek Këshilli i legjislacionit duke e cilësuar si antikushtetues.
Komisioni i Sigurisë mund ta aprovonte apo rrëzonte, mund ta kthente për papajtueshmëri si komision përgjegjës me argumentin se ky ishte lëndë legjislative më e përshtatshme për Komisionin e Ligjeve, por që një komision ta dënojë me vdekje një ligj të propozuar, ku nuk është as prerogative e tij e as i takon . Për këtë shprehet Gjykata Kushtetuese ose vendimi, me të cilin kalohet në seancë plenare.
Sot, unë kam disa pyetje publike për anëtarët e Komisionit të Sigurisë.
Së pari, opozita në Komision është dakord me antikushtetueshmërinë e këtij akti? A është ky edhe mendimi i opozitës? Pra, zoti Noka si nënkryetar Komisioni bashkohet me zotin Braho që t’i heqësh xhelatëve dekoratat e nderit është e padrejtë dhe antikushtetuese?
Së dyti, pse nuk është dërguar bashkë me këtë ligj edhe ligji i propozuar nga deputetët Edi Rama dhe Taulant Balla? Objekti është i njëjtë, ndryshimet janë të ngjashme? Pse ka dy standarte, e turpshme si servilizëm ndaj Kryeministrit? A eshte dakord opozita me këtë akt?
Së treti, shërbimet përgjegjëse të Kuvendit të dërgojnë aktin për procedurë disiplinore ndaj atyre që kanë thyer rregulloren e Kuvendit dhe kanë dërguar në kalendat greke ligjin e medaljeve.
Së fundmi, e dinim që do ju dhimbte në shpirt heqja e dekoratave për xhelatet disa prej të cilëve jane në këtë Kuvend, përgjegjës për katrahuren politike që jetojnë qytetarët shqiptarë, por kjo nuk na bën të tërhiqemi nga asnjë iniciativë e jona. Ditën për diell do dalin gjithë krimet që janë kryer dhe nderimet që nuk janë një e drejtë, por një mirënjohje që shoqëria jep për individët më të mirë të saj, ndaj këta nuk do munden t’i gëzojnë. Nuk do ndalemi, të kërkojmë respektimin e Kushtetutës dhe Rregullores së Parlamentit.
