Nga Luljeta Progni
Rezoluta e fundit e Parlamentit Evropian për Shqipërinë u kalua pa shumë vëmendje nga media dhe opozita. Ngjarjet tragjike në Bruksel, por edhe zhvillimet e brendshme, siç ishte deklarata e ambasadorit amerikan Donald Lu për Byronë e Hetimit dhe Al Kaponet e Shqipërisë duket se e zbehën atë që Parlamenti Evropian shprehte në atë rezolutë. Dokumenti i miratuar dy ditë më parë nga Komisioni i Jashtëm në PE, flet për përkeqësim të treguesve kryesorë që përcaktojnë negociatat për anëtarësim mes Shqipërisë dhe Bashkimit Europian.
Në të jepen sinjale të qarta se nuk ka ecuri në prioritetet bazë të vendosura si kusht nga Brukseli për Shqipërinë. Dhe kur flitet për integrimin lufta kundër korrupsionit e krimit të organizuar është një ndër kriteret kryesore.
Por, kur të gjithë presin të ketë rezultate në këtë drejtim në fakt konstatohet e kundërta, ka përkeqësim. Korrupsioni, nëse do të flisnim me terminologjinë e kryeministrit, është bërë një sëmundje që në vend që të lokalizohet i ka shtrirë metastazat në të tëra nivelet e qeverisje, është bërë i kudogjendur. Në rezolutë thuhet: “Vazhdon të jetë shqetësuese përhapja e korrupsionit veçanërisht në arsim, shëndetësi, drejtësi prokurorimet publike, ndërtimet, planifikimin e territorit dhe qeverisjen lokale”. Ky konstatim i Parlamentit Evropian e largon akoma më shumë Shqipërinë nga Bashkimi Evropian.
U duk se me Lazaratin, do t’i bindnim evropianët, se vendi po ndahej nga një e shkuar kriminale e drogës, por kjo në sytë e tyre nuk ka ndodhur. Në rezolutë thuhet se vlerësojmë përpjekjet, por trafiqet mbeten një problem shumë i madh për Shqipërinë. Kjo është një tjetër notë jokaluese.
Rruga drejt Bashkimit Evropian është e përcaktuar edhe nga kriteri politik. Rezoluta ka thirrje drejtuar forcave politike për dialog më të madh për reformat, për bashkëpunim mes qeverisë dhe opozitës në Kuvend që cilësohet si themelor për ecurinë e vendit drejt BE-së. Përshëndetja për miratimin unanim të ligjit të dekriminalizimit, shoqërohet nga pas me një listë detyrash që ende nuk po plotësohen. Prej Parlamentit pritet miratimi sa më parë i ligjit për mbrojtjen e dëshmitarëve, forcimi i legjislacionit antikorrupsion, përfundimi i reformës në drejtësi, ku si një qershi mbi tortë pret adoptimi i njësisë antikorrupsion për të pasuar në vijim me hetimesh reale, ndjekje penale dhe dënime për korrupsion në të gjithë nivelet e qeverisjes.
Rezoluta e ka pjesë të veten edhe zgjedhjet, kriter bazë në rrugën drejt BE-së. Ndërhyrjet për legjislacionin janë përcaktuar qartë e nuk lënë shteg për shumë retorikë. Në rezolutë kërkohet zbatimi i rekomandimeve të OSBE ODIHR-it, kërkohet krijimi i komisoneve elektorale të pavarura, tërhiqet vëmendja se blerja e votës është një kërcënim, ndaj të cilit duhen ndërmarrë masa urgjente. Edhe në këtë drejtim mbetemi në vendnumëro.
Për rezolutën e PE po kaq larg integrimit jemi edhe në pikëpamje të kriterit ekonomik. Rezoluta vëren me shqetësim përkeqësim, sidomos në aspektin e punësimit. “Papunësi e lartë sidomos në moshën e re”, është një frazë e shkëputur nga rezoluta, por që në realitetin e vendit ndërlidh treguesit e përkeqësimit të gjendjes.
Situata është e qartë. Në mos kemi ngelur në vend, po ecim aq ngadalë si breshkat që Rama ka për zemër.
