Nga sherri në adoleshencë, tek përplasjet brenda PS, betejat si kundërshtarë dhe deri tek paqja e dyshimtë mes tyre. Historia (ar)miqësore Meta-Blushi.
Duket e pazakontë që deputetët e Lëvizjes Socialiste për Intergrim ta mbrojnë Ben Blushin. Në marrëdhëniet mes Blushit dhe Metës ka pasur gjithmonë probleme. Ata kurrë nuk kanë qënë miq apo bashkëpunëtorë, as kur ishin bashkë në PS e as kur ishin në koalicion PS-LSI. Madje, as kur kanë qenë të rinj, adoleshentë. Babai i Ilir Metës e dëshmon këtë në një rrëfim për të birin disa vite më parë. Ai thotë se Iliri nuk ishte shumë problematik, por kishte pasur një rast kur ishte zënë me një shok dhe ai 
ishte Ben Blushi. Ishin gjimnazistë dhe në zënkë e sipër Ben Blushi e kishte goditur me grusht Ilirin duke i nxirë syrin.
Disa vite më pas, Meta dhe Blushi do të shiheshin në arenën politike shqiptare. Ilir Meta si politikan, ndër të rinjtë e suksesshëm të FRESSH dhe PS-së, ndërsa Ben Blushi si gazetar deri në vitin 1999 e më pas politikan. Ben Blushi ishte shef kabineti i Kryeministrisë, kur qeveria drejtohej nga Fatos Nano dhe në atë kohë zhvillohej beteja e fortë midis grupit të Ilir Metës dhe atij të Fatos Nanos. Padyshim që Ben Blushi ishte në krahun e Fatos Nanos, deri në momentin kur Ilir Meta u largua nga Partia Socialiste.
Largimi i Ilir Metës nga Partia Socialiste në vitin 2004, do të pasohej me humbjen e kësaj partie në zgjedhjet e një viti më vonë. Ben Blushi do të rreshtohej me nxitim në grupin e atyre që bënin fajtorë Ilir Metën për humbjen e këtyre zgjedhjeve.
Edhe pas katër vitesh, historia e zhvillimeve politike brenda së majtës vazhdonte të kishte padyshim si protagonist Ilir Metën. Ky i fundit pati ndikim të fortë në zhvillimet brenda PS-së, kur bëri aleancë me Berishën pas zgjedhjeve të vitit 2009. Marrëveshja e shpëtoi të djathtën nga vështirësia që vinte nga një rezultat fitues, por i pamjaftueshëm për të qeverisur. Kalimi i Metës në aleancë me Berishën, shkaktoi tërmet brenda PS-së. Natyrisht, Ben Blushi nuk do ta përfillte më faktorin Ilir Meta si përcaktuesi për humbjen e PS-së. Ishte koha, kur po tentonte të largonte Edi Ramën dhe Ilir Meta nuk i duhej as si i sulmuar. Edi Rama nuk e la drejtimin e PS-së, ndërsa Blushi u kthye në krah të tij me një marrëveshje që ende nuk e dimë, por shpesh është thënë se është fjala për pazare. Blushi u kthye tek Edi Rama, duke lënë pas katër deputetët të PS-së të cilët e kishin mbështetur në qëndrimet e tij kundër Ramës, në Lëvizjen Për Mendimin Ndryshe në PS (LMN). Arben Malaj, Andis Harsani, Kastriot Islami, Marko Bello nuk patën më të ardhme në PS sepse Rama i ndëshkoi. Ata u bënë “viktimat” e para politike të Ben Blushit.
Pati momente, kur flitej për bashkim të së majtës, por Ben Blushi ishte gjithmonë kundër aleancës PS-LSI. Papritur, në maj të vitit 2012, Ben Blushi deklaroi se ishte shumë dakord me idenë e bashkimit me LSI-në për të përmbysur Berishën nga pushteti. Kishte kaluar vetëm një vit e gjysëm nga ngjarja e 21 janarit, ku u vranë katër protestues socialistë që ishin në sheshin para kryemninistrisë për të protestuar kundër korrupsionit të Ilir Metës, i shfaqur, siç thoshte Rama: “Me zë e figurë, faqe gjithë shqiptarëve“. Megjithatë Ben Blushi e kapërceu këtë moment dhe deklaroi nevojën për bashkim.
“Sigurisht që e mbështes një koalicion me LSI-në. Nuk kam asnjë dilemë për këtë. Pavarësisht se çfarë ka ndodhur, eventualisht ne mund të kemi një koalcion me LSI-në”, tha asokohe Blushi.
Një vit më vonë ndodhi që të arrihej marrëveshja mes PS-së dhe LSI-së dhe natyrisht i pari që ishte kundër ishte Ben Blushi. Në prill të vitit 2013, kur Rama vendosi të bashkëpunojë me Ilir Metën, Blushi u kujtua se ndërmjet PS-së dhe LSI-së ishte 21 janari një ngjarje që nuk mund të kapërcehej. Në një mbledhje kryesie të atyre ditëve, Ben Blushi i mbështetur edhe nga Pandeli Majko, e kundërshtuan ashpër marrëveshjen e Ramës me Ilir Metën duke risjellë në vëmendje viktimat e 21 janarit. Mungesa e theksuar e koherencës në qëndrimet e tij, dëshmon për pazaret, për të cilat ai është gjithmonë i gatshëm të bëjë në dobi të karrierës së tij, edhe nëse i duhet të lërë pas “viktima”, siç ishin deputetët e LMN-së.
Ndërsa në gushtin që sapo lamë pas, skema e Ilir Metës për të përmbysur qeverinë dështoi, sepse Ben Blushi e gjeti fjalën me “armikun” Rama, duke u joshur pikërish nga posti që mbante Ilir Meta në krye të Kuvendit, kurse Mimoza Hafizi do të merrte portofol ministri. Kjo e detyroi Metën të tërhiqej nga aksioni i tij konspirativ, duke e lënë Blushin thatë dhe sërish në kënetën e tij të mërisë.
Ky është Ben Blushi që po i duket LSI-së si njeriu i fortë, me të cilin paskëshin fituar zgjedhjet në vitin 2013. Në Elbasan, Ben Blushi ishte në krye të listës së PS-së në zgjedhjet e vitit 2013. Në krahasim me qarqet e tjera, Elbasani nuk është rezultati, me të cilin mund të krenohet PS, pasi në këtë qark, PDIU-ja arriti t’i marrë PS-së së Blushit dhe LSI-së së Ilir Metës, hiç më pak se 12.110 ose 6,98% të votave. Kështu që ministrat e LSI-së që kanë marrë përsipër të mbrojnë “nderin” e Blushit, duhet të lexojnë historinë e qëndrimeve të tij dhe rezultatet që ka lënë ai pas. Është kjo “dashuria” e momentit mes tyre, në mos qoftë një tjetër, marrëveshje mes tij dhe Metës, siç po thonë, e sponsorizuar nga qarqe të dyshimta.
