Kreu i LSI-së, Petrit Vasili ka deklaruar se PS nuk mund të ndërmarrë asnjë nismë ligjore që do të mund të pengonte betimin e Ilir Metës si President i vendit.
I ftuar në emisionin “Opinion” të gazetarit Blendi Fevziu, Vasili tha se shqiptarët kanë fat të mirë që në kohë kaq të vështirë Meta të zgjidhet president i vendit më 24 korrik.
Gazetari: Ka diçka që po qarkullon se mund të ketë një nismë që PS të mos lejojë Presidentin Ilir Meta të nisë detyrën. Si e komentoni?
Vasili: Për fatin e zi të tyre Ilir Meta më 24 korrik merr detyrën e tij si President i Republikës për fatin e mirë të shqiptarëve. Ilir Meta është President i shqiptarëve dhe do të marrë detyrën e tij me të gjitha obligimet që duhen në këtë vend shumë delikat për vendin. Duhet patjetër roli i një garanti dhe Ilir Meta ka pjekurinë, historinë dhe maturinë. Në këtë kohë shumë të vështirë për vendin është një fat i madh që atje ndodhet Ilir Meta.
Vasili paralajmëroi një koalicion me me Partinë Demokratike në frontin opozitar, nqs PD-ja mban të njëjtin qëndrim me LSI kundrejt qeverisë.
Gazetari: A do të bashkëpunoni me Partinë Demokratike, pjesën tjetër të opozitës
Vasili: Ne kemi një aksion opozitar tonin, i cili do të jetë i drejtpërdrejtë dhe ballor. Sa herë që PD do të ketë të njëjtin qëndrim të drejtë, të drejtpërdrejtë dhe jo të kapur, atëherë nuk ka arsye se përse nismat të mos jenë të përbashkëta.
