Një shpërthim tritoli ka ndodhur mbrëmjen e djeshme, në fshatin Larushk Fushë-Krujë, në cepin e oborrit që lidh banesat e Xhisiela Malokut dhe xhaxhait të mamasë së saj.
Ngjarja ka ndodhur mbrëmjen e kaluar, rreth orës 23:30. Raportohet se nga shpërthimi nuk ka të lënduar dhe as dëme materiale, ndërsa tronditja ka qenë e madhe. Policia ka shkuar menjëherë në vendin e ngjarjes dhe ka shoqëruar 9 persona.
Vetë Xhisiela është shprehur në disa dalje të mëhershme për mediat se ajo ka pasur një marrëdhënie shumë të afërt me gjyshin dhe dajat nga ana e së ëmës, pasi ata e kanë mbështetur pas humbjes së të atit. Theksojmë se vetë Xhisiela qëndronte në banesën e gjyshit të saj.
Xhisiela Maloku, ka “trazuar” politikën shqiptare dhe mediat kohët e fundit, pas një denoncimi të ish-oficerit të policisë, Emiljano Nuhu se ajo ishte përdhunuar nga djali i deputetit Rrahman Rraja, Rexhep Rraja. Kurse vetë Xhisiela në disa dalje televizove ka mohuar që të jetë përdhunuar apo kërcënuar nga Rraja.
