Institucioni do të varet nga Policia e Shtetit dhe do të ketë të angazhuar fillimisht vetëm policë
Këshilli i Ministrave miratoi sot në mbledhjen e qeverisë projektligjin për Byronë Kombëtare të Hetimit, raporton “Ora news”.
Sipas variantit të miratuar në qeveri Byroja Kombëtare e hetimit do të jetë në varësi të drejtorit të Policisë së Shtetit, por ndryshe nga projektligji i parë që u rrëzua, hetimet penale do t’i kryejë Prokurori i Përgjithshëm përmes një grupi prokurorësh që do të ngrejë. Drejtuesi i Byrosë së Hetimit do të jëtë kompetencë e ministrit të Brendshëm, por kandidati do të duhet të ketë edhe pëlqimin e Prokurorit të Përgjithshëm.
Drafti i përpunuar gjatë muajve të fundit pas kthimit nga Gjykata Kushtetuese të variantit të mëparshëm të ligjit, sipas burime të Ora News është hartuar në bashkëpunim me OPDAT, ka mbështetjen e SHBA dhe është dhënë pëlqim edhe nga kreu i opozitës.
Duke qënë se ka dakortësinë e të gjtiha palëve, pritet që projektligji të miratohet me nxitim në Kuvend, megjithatë projektligji i miratuar sot në mbledhjen e qeverisë, është kundërshtuar nga disa ministra ndër të cilët edhe ai i Drejtësisë, Ylli Manjani. Ata argumentuan se projekligji është antikueshtetues në pikën për varësinë e Byrosë nga Policia e Shtetit.
