Tani është shansi i madh i Kombëtares tonë për të bërë një paraqitje ndryshe në miqësoren e rradhës që do të luhet nesër dhe kështu mund të mbyllen edhe “gojët e liga”. Por aventuara për të mbërritur në Luksemburg është kthyer në një tjetër ndeshje të keqe. Përpara se të linin hotelin e tyre në Vienë, skuadra zhvilloi një seancë stërvitore paraditen e djeshme po në kryeqytetin austriak. Më pas çunat u vonuan pak edhe për t’u bërë gati, ndoshta problem me gjetjen e xhelit që do i shkonte modelit të flokëve. Më pas trafik, ndërsa në aeroport kishte një alarm fals për bombë. Kështu, dikush bëri “check-in” dhe dikush jo, në fund i gjithë ekipi u kthye sërish në hotel, ndërsa FSHF ka vendosur të padisë agjensinë ajrore, pasi pilotët e avionit të tyre patën paturpësinë të linin pistën e aeroportit të Vienës fiks në orarin e caktuar. Vetëm sot në orën 15:00, De Biazi me të tijët do ta provojnë edhe një herë për të mbërritur në Luksemburg, ku sipas programit do të ndeshen nesër me vendasit në orën 20:15.
