Basha: Si 25 vite më parë, do të protestojmë për të çliruar Shqipërinë nga kthetrat e oligarkisë Rama-Meta. Dëshmorët janë frymëzimi ynë dhe ne do të fitojmë”
Kryetari i PD-së, Lulzim Basha, ishte sot në Shkodër për të përkujtuar ngjarjen e 2 prillit ku humbi jetën themeluesi i PD-së, Arben Broci dhe tre të rinj të tjerë shkodranë. Lideri i opozitës tha se sakrifica e 4 të rinjve është frymëzim i krenarisë dhe lirisë sonë sot dhe e sprovës për t’i dalë para së keqes që i ka zëne rrugën vendit si para 25 vitesh.
“Njësoj si regjimi komunist edhe këta duan pushtet me çdo kusht dhe çdo çmim, ashtu si 25 vite më parë. Vjedhin votën, shkelmojnë ligjin. Modeli i tyre është e shkuara, krimi që vrau Shkodrën, modeli i tyre është pasurimi i qeveritarëve dhe varfërimi i qytetarëve. Këtë mendje kanë patur paraardhësit e tyre politikë, të njëjtën mendje kanë edhe sot se pushteti është mbi ligjin, jo ligji, se pushteti është dhuna dhe dajaku. Janë jashtë sistemit demokratik që Shkodra dhe Shqipëria përqafoi 25 vite më parë. Do të protesojmë kundër aleancës së qeverisë me krimin, që ka marrë nën këmbë shtetin si ortakë të Edi Ramës. Jemi të vendosur ashtu si 25 vite më parë që të mos nëpërkëmbet Shqipëria, do të protestojmë për të çliruar Shqipërinë nga kthetrat e oligarkisë Rama-Meta. Dëshmorët janë frymëzimi ynë dhe ne do të fitojmë”, tha Basha.
Në përkujtimin e ngjarjes së 2 prillit, mungoi Jozefina Topalli, deputete e Partisë demokratike në Shkodër.
