Duket se po vjen ora. Politika shqiptare s’ka më nga lëviz. Mesazhi i Shteteve të Bashkuara të Amerikës është më i qartë se kurrë: SHBA-të e kërkojnë reformën në drejtësi më 21 korrik e jo më vonë. “Reforma në drejtësi do të miratohet, por pyetja është nëse ky Kuvend dhe udhëheqësit politikë do të mbahen mend për suksesin apo do të fajësohen për dështimin e saj”.
Këtë deklaratë e bëri ambasadori amerikan Donald Lu, bashkë me disa mesazhe të tjera shumë të rëndësishme drejtuar politikës shqiptare. Në deklaratën e djeshme nuk është lajmi kritika e përsëritur e Donald Lu për kryetarin e opozitës. Lulzim Basha i ka marrë tashmë të gjitha vlerësimet negative nga SHBA-të. Lajmi është se Donald Lu i ka futur të gjithë në një thes.
“Gjysmë ore më parë pyeta se kush ka më shumë frikë nga kjo reformë. Krerët e krimit të organizuar, gjyqtarët e korruptuar apo politikanët kriminelë. Sot përgjigja është e qartë; të gjithë po e luftojnë. Të enjten, deputetët e Kuvendit kanë mundësi të tregojnë qëndresë për popullin e Shqipërisë që e kërkojnë këtë reformë”, tha Lu.
Pra, duket qartë se jashtë akuzës nuk ka mbetur kush. Aq më e qartë bëhet situata, kur Lu refuzon rolin që tinëxisht kërkoi t’i japë kryeministri Rama, tek tha se ja letra e bardhë, le të shkruajë mbi të ç’të dojë opozita, por ajo të ketë vulën e SHBA-së dhe BE-së dhe “Unë e miratoj pa i hequr asnjë presje”. Në përgjigje të kësaj deklarate ambasadori amerikan Donald Lu, tha:
“Sot zoti Rama njoftoi se u ka dhënë fund negociatave me opozitën dhe tha se do të pranonte çdo kërkesë të opozitës që të pranohej nga BE dhe SHBA.
Unë e refuzoj edhe këtë rol. Përgjegjësia për zgjidhjen e problemeve politike të Shqipërisë qëndron mbi udhëheqësit shqiptarë. Ka ende kohë që zoti Basha dhe zoti Rama të gjejnë një kompromis. Nëse ata nuk munden, Kuvendi duhet ta miratojë këtë reformë. Harku i historisë është i gjatë, por ajo anon nga drejtësia.”
Para mesazhit të ambasadorit, ka pasur disa sinjale në media prej mazhorancës. Për të gjithë ata që e ndjekin politikën përmes mediave e kuptojnë pa asnjë dyshim se cilat janë mediat që mbështesin shumicën dhe cilat opozitën. Është krejt e lehtë për t’u lexuar kjo, për shkak se media në Shqipëri është tërësisht e politizuar. Nuk lë vënd për asnjë dyshim.
Dy media pranë mazhorancës kanë hedhur sot sinjale kundër miratimit të reformës në drejtësi. Një prej mediave pranë Ramës ka publikuar një artikull ku tentohet të njolloset fort ambasadori amerikan Donald Lu. Ata kanë publikuar një letër që sipas tyre, i ka dërguar ambasadori amerikan prokurorisë dhe ku kërkohet të pushohet çështja hetimore ndaj kompanisë amerikane Bankers Petrolium. Duket kaq i qartë ky sinjal që vjen nga mediat e Ramës. Po ashtu, botuesi i Shqiptarja.com dhe Report tv, Karlo Bolino, ka shkruar një artikull ku i sygjeron kryeministrit Rama t’i thotë “Jo”, SHBA-ve siç bëri për armët kimike. I sygjeron të ndërmarrë këtë hap për të mos prishur qeverinë.
Ndërsa mbrëmë në Ora news është publikuar një intervistë e ministres së mbrojtjes Mimi Kodheli, ku ajo thotë: “T’ju them të drejtën ne jemi maturuar mjaftueshmërisht që gjërat t’i bëjmë vetë. Është i mirëpritur çdo ndërkombëtar, çdo dashamirës, çdo institucion që mbështet dhe shtyn gjërat e mira në Shqipëri. Por, populli shqiptar ka një proverb shumë popullor dhe shumë aktual; i zoti e nxjerr vet gomarin nga balta. Ndërkombëtarët janë të mirëpritur të bëjnë gjithçka, por detyrat, në qoftë se nuk i bëjmë vetë do të jetë thjesht dhe vetëm një artificë që nuk do të zbatohet kurrë. Mbase, gjërat e impostuara kanë sjellë më shumë dëm se sa të mira”.
Nëse dy mediat pranë kryeministrit justifikohen me faktin se kanë linjën e vet editoriale dhe nuk kanë arsye të japin shpjegime për çfarë thonë e shkruajnë, për ministren e kabinetit të tij, Rama duhet ta ketë një shpjegim. Ka pak gjasa që ministrja Kodheli ta këtë bërë atë deklaratë në mendjen e saj e pa u këshilluar me shefin. Gjithçka ndodh edhe ndoshta, por nuk duket të jetë kaq rastësi që këto sinjale vijnë nga shumica në këto ditë të fundit, kur s’ka mbetur shumë kohë e palët do të përballën me dinjitetin e tyre në sallën e Kuvendit të Shqipërisë më 21 korrik. Nuk duket të jetë kaq rastësi që në oborret e PD-së ka nisur të shihet me simpati Koço Kokëdhima, jo vetëm për faktin se së fundmi shkon shpesh në Gjirin e Lalzit, por thonë se ka nisur të bëjë ndonjë vizitë edhe në zyrat e PD-së.
Përpjekjet nuk kanë reshtur. “Rezistoni edhe pak!”… është një mesazh që deputetët e mazhorancës i japin atyre të opozitës herë pas here në këto javë të debatit për reformën në drejtësi. Është pohuar nga më shumë se një deputet i PD-së ndaj dhe duket të jetë i vërtetë. Ajo çfarë fsheh ky mesazh është marrëveshja e madhe e të gjitha palëve të politikës për të mos e miratuar këtë reformë në drejtësi, e cila është veçse nisje e fundit të tyre. Ndoshta janë veçse thashetheme, por këto sinjale e këto fjalë lart e poshtë po krijojnë idenë se është koha që të gjithë të bëhen bashkë, sepse kanë përballë kërcënimin e madh, hapjen e dosjeve të tyre të korrupsionit. Por, tashmë janë vonë sepse me ç’duket republikës së koçove dhe karlove po i ikën koha.
Ambasadori Donlad Lu ka thënë i bindur se reforma në drejtësi do të votohet, pavarësisht sjelljes së liderëve politikë. Le të presim e të shohim se si do të miratohet kjo reformë, sepse nuk duket të jetë një betejë e lehtë për SHBA-të. Është parë herët e po shihet më qartë se kurrë këto ditë të fundit, se ky Kuvend e kjo elitë politike nuk ka asnjë dëshirë ta miratojë refomën në drejtësi, pasi s’mund të besojmë se do të votojë për fundin e tyre. Le të presim e të shohim se si do të ndodhë reforma në drejtësi.
