Mesfushori i Tiranës është kthyer nga Shtetet e Bashkuara ku nuk ka luajtur fare futboll për një vi të tërë dhe ndaj Kukësit ishte sërish më i miri në fushë
Mjafton të kesh marrdhënie të mira topin dhe në futbollin që luhet në Shqipëri mund të spikatësh edhe pa pasur nevojë për aftësi të jashtëzakonshme fizike. Që Afrim Taku ka qenë gjithmonë i talentuar, madje që në fillimet e veta në ekipet zinxhirë të Tiranës, kjo është e padiskutueshme, por mjaftoi të vendoste të bashkohej me skuadrën pas një viti dhe menjëherë ka spikatur. Në përfundim të edicionit 2014-2015, Taku u largua për në Shtetet e Bashkuara të Amerikës dhe nuk u mor më me futbollin e luajtur në nivele të larta, ndërsa pas një viti është bashkuar sërish me Tiranën dhe pikërisht në javën e dytë të kampionatit, në ndeshjen ndaj Kukësit pretendent për të fituar titullin e madh, jo vetëm shënoi një nga golat e skuadrës së tij, por ishte absolutisht edhe lojtari më i mirë në fushë. Në fakt, 27 vjeçari Afrim Taku është larguar nga futbolli i luajtur në Shqipëri në periudhën më të mirë të tij, madje më 13 qershor 2015 ishte grumbulluar nga trajneri De Biazi për miqësoren Shqipëri – Francë, që u luajt në “Elbasan Arena” dhe u fitua 1-0 nga tanët.
