Partia Drejtësi Integrim dhe Unitet ditën e sotme ka deklaruar se vetëm heqja e Ramës si kryeministër i Shqipërisë mund të heqë 15 kushtet të cilat u miratuan sot me anë të një amendamenti në PE.
PDIU përmes një deklarate në rrjetet sociale thotë se disa prej kushteve kanë të bëjnë me reformën zgjedhore dhe me zgjedhjet por deri tani Rama vetëm ka kërcënuar nga foltorja e vendit pasi kërkon një komardare shpëtimi.
Gjithashtu PDIU thotë se edhe marrja e statusit të vendit kandidat prej 7 vitesh ka mbetur si “pëlhura e Penelopës” me të cilën endet Rama dhe që nuk mbaron kurrë.
Deklarata e plotë:
Parlamenti Europian miratoi dje rezoluten në të cilën kërkohet plotësimi i 15 kushteve përpara konferencës ndërqeveritare për vendosjen e hapjes së negociatave.
Po ky parlament në 2013 aprovoi marrjen e statusit të vendit kandidat, por jo datën e hapjes, e cila prej 7 vitesh ka mbetur si pëlhura e Penelopës që endet nga Edi Rama çdo vit e që nuk mbaron kurrë.
Në vitin 2013 ishin 5 kushte, më pas u shtuan të tjera çdo vit dhe tani janë 15 kushte që kërkojnë shtet ligjor, zgjedhje të lira e të gjithpranuara, hetim të korrupsionit e krimit elektoral.
Ky është bilanci i Ramës në 7 vite qeverisje, nga 5 në 15 kushte, si pasojë e dëmeve të kryera prej tij në shtetin ligjor, kapjen e të gjitha pushteteve, korrupsionin galopant dhe dhunimin e vjedhjen e zgjedhjeve.
Tre kushtet e para kanë të bëjnë pikërisht me zgjedhjet, reformën zgjedhore konsensuale, implementimin e saj dhe hetimin e krimit zgjedhor. Deri tani kemi parë vetëm kërcënime nga foltorja e parlamentit për grisje të çdo konsensusi, loje basketbolli me top e pa top, që të sajojë në tavolinë formula të njëanshme për ta nxjerrë përsëri fitues, si dhe diversione me koalicione e pa koalicione, me lista të hapura e të mbyllura, që të sajohen komardare shpëtimi për Ramën dhe rilindjen.
Shqiptarët e kanë sot të qartë më shumë se kurrë që vetëm heqja e Ramës mund të heqë kushtet që shtohen çdo vit për Shqipërinë nga BE.
