Sipas Ramës taksa për “Rrugën e Kombit” e ka zanfillën në vitin 2010, pikërisht kohë kur vendi qeverisej nga Berisha. Kreu i qeverisë tha se Berisha mori iniciativën për të hapur këtë proces.
“Vendimmarrja për të vendosur tarifën për përdoruesit e Rrugës së Kombit, se nuk është taksë, e ka zanafillën më 2010. Kryeministri i kësaj kohe mori iniciativën për të hapur këtë proces dhe tha publikisht si rrallë në karrierën e tij atë që sot e mohon. ‘Ne e ndërtuam për ta mirëmbajtur, nuk e mirëmbajmë dot’, kjo nuk është një fjalë kot. Pamundësia e mirëmbjajtjes ka sjellë degradime në atë aks, rrëshqitje, rënie, përmbysje”, tha Rama në seancën e sotme plenare.
Basha e ka cilësuar Ramën të pacipë duke i thënë se ra në gropën që vetë ndërtoi. “Ngërdheshja tregon sa i pacipë je. Re në gropën që vetë ndërtove. E pranove para shqiptarëve se kjo që po bën është e paprecedentë, ju vure shqiptarëve taksë, tani do të paguajnë dhe tarifë”, deklaroi kreu i opozitës.
Monika Kryemadhi e ka cilësuar taksën në Rrugën e Kombit një ‘vijë demarkacioni’ mes Shqipërisë dhe Kosovës. “Rruga e Kombit që pas shekujsh luftërash dhe konfliktesh lidhi vëllezërit e një gjaku, rrezikon të kthehet në “vijën e demarkacionit” të ri mes Shqipërisë dhe Kosovës. Për çfarë integrimi europian flasim, kur veriu i Shqipërisë përveç varfërisë ekstreme tashmë duhet të paguajë dhe taksën e izolimit”, tha ajo.
