Partia Drejtësi Integrim dhe Unitet në një deklaratë të publikuar në rrjetet sociale kërkon nga parlamenti i Shqipërisë që të miratojë rezolutën e propozuar nga Vetëvendosja për dënimin e genocidit serb në Kosovë.
PDIU shprehet se propaganda e qeverive duhet të marrë fund dhe duhet të reagojmë të gjithë në përmbushjen e objektivave të përbashkëta.
Deklarata e plotë:
Sot kur po bëhen më shumë se 20 vite nga fitorja e luftës çlirimtare të Kosovës, përfaqësuesit politikë të Kosovës ndodhen në bankën e të akuzuarve ndërsa parlamenti i Shqipërisë nuk ka miratuar ende asnjë deklaratë, për dënimin e vrasjeve, masakrave, përdhunimeve dhe deportimit masiv të populatës.
PDIU kërkon nga parlamenti i Shqipërisë të miratojë rezolutën e propozuar nga Vetvendosja për dënimin e genocidit serb në Kosovë. Të gjithë bashkë në një flamur të reagojmë me dinjitet e në mbrojtje të historisë tonë, të së shkuarës dhe të së ardhmes.
I kërkojmë qeverive të Shqipërisë dhe Kosovës të nisin urgjentisht punën për ngritjen në Prishtinë të muzeut të krimeve serbe, që të mbetet si një monument kujtese për të gjithë brezat.
Propaganda e mbledhjeve boshe të qeverive duhet të marrë fund. Duhet të reagojmë bashkërisht në përmbushjen e objektivave të përbashkëta dhe nderimi i memorjes kombëtare e denimi njëzëri i krimeve, duhet të jetë hapi i parë dhe urgjent.
