Ministri i Brenshëm Sajmir Tahiri ishte këtë të hënë në komisioni hetimor parlamentar për çështjen e përgjimeve ku po merrej në pyetje lidhur me pajisjen “IMSI Catcher”.
Gjatë seancës kryetari i Komisioni Hetimor Flamur Noka dhe Ministri i Brendshëm Saimir Tahiri, patën debate të shumta lidhur me paisjen e përgjimeve, ndërsa më tej Ministri Tahiri i ka sugjeruar komisionit që t’i drejtohet prokurorisë për kërkesat e saj.
Në seancën dëgjimore ka pasur përplasje të shumta midis mazhorancës dhe opozitës.
Pjesë nga debati:
Noka: Z. dëshmitar jeni në dijeni të futjes në territorin e Republikës së Shqipërisë të një pajisje të quajtur Imsi Catcher?
Tahiri: Jam dijeni për çdo gjë që ka të bëjë me detyrën time. Për çdo çështje tjetër pyesni institucioneve përgjegjëse.
Noka: Mos më këshilloni, jeni këtu për të dhënë përgjigje. Vazhdoni.
Tahiri: Për këtë çështje ka një hetim nga prokuroria.
Noka: A jeni në dijeni?
Tahiri: Nëse keni rezerva për përgjigjen time, mund të bëni edhe kallëzim penal.
Noka: Zoti dëshmitar, në një emision televiziv në Top Channel keni deklaruar se në Shqipëri është futur një pajisje Imsi Catcher dhe se ajo është futur vetëm për të përgjuar numrat.
Tahiri: Mund t’i referoheni Sokol Ballës dhe asaj që kam thënë.
Noka: Jeni ju i thirrur, jo Sokol Balla, ndaj përgjigjuni!
Tahiri: Kjo ishte përgjigjja ime, nëse keni rezerva bëni kallëzim në Prokurori. Unë u përgjigja.
Noka: Zoti dëshmitar keni thënë në një emision televiziv se pajisja Imsi Catcher është përdorur vetëm nga specialistë italianë, jo shqiptarë.
Tahiri: Mund t’i referoheni përgjigjes që kam dhënë publikisht.
Noka: Në 12.6.2015 në burgun 302 në librin e protokollit ekziston e shënuar që me urdhër të drejtorit të futet në ambientet e burgut, makina me targë AA 380 BG me drejtues Eltion Xhelili që ëhstë një nga dëshmitarët e thirrur për këtë çështje për të monitoruar cilësinë e ajrit në burg. A jeni në dijeni dhe a është Xhelili punonjës i policisë?
Tahiri: Referojuni të dhënave dhe borderove të policisë.
Noka: Zoti dëshmitar a është përdorur Imsi Catcher për përgjim
Tahiri: Përgjigjja ime për këtë dhe çdo pyetje tjetër është referojuni hetimeve që po bën prokuroria.
Noka: Zoti ministër keni dijeni për personat shqiptarë që kanë dërguar pajisjen nga Dogat në drejtojnë e Policisë?
Tahiri: Me gjithë respektin ju këshilloj t’i drejtoheni Prokurorisë.
Noka: A keni dijeni se ku është mbajtur pajisja nga momenti i hyrjes dhe në daljes?
Tahiri: Me gjithë respektin mund t’i drejtoheni prokurorisë dhe nëse keni pakënaqësi ndaj meje me akuzoni për pengim të hetimit.
Noka: Kush janë trajnuesit dhe kush është lista e atyre që janë trajnuar?
Tahiri: Me gjithë respektin, drejtojuni prokurorisë.
Asllan Dogjani: Me gjithë respektin e përgjigjeve, pasi nuk dëgjuam përgjigje, Kur jeni thirrur në seancë dëgjimore më herët ju pohuat se disponohet një pajisje e tillë. Keni shprehur se Policia e Shtetit disponon një pajisje të tillë, Desha të di se ku ndodhet kjo pajisje dhe për çafrë e ka përdoru policia atë? Kush e ka bërë trajnimin, policia shqiptare apo ajo italiane? Kush persona janë përgjuar dhe kush janë trajnuar?
Tahiri: Me gjithë respektin, drejtojuni prokurorisë.
Noka: Përgjigja e dytë zoti dëshmitar?
Tahiri: Drejtojuni prokurorisë.
Dogjani: Po lexoj çka keni thënë ju: Kjo pajisje nuk është për përgjim, por për trajnimin e policisë.
Tahiri: Drejtojuni prokurorisë. Nuk kam shumë kohë të humbas me kompetent që keni për të bërë. Kam shumë punë dhe kam shumë gjëra për të bërë në jetën time.
Noka: Ju duhet të përgjigjeni. Nuk na duhet se sa punë keni.
Ministri Tahiri në këtë moment ngrihet dhe ikën nga salla.
Noka: Suksese në jetë zotëri, dhe shpjegoju qytetarëve këtë ngjarje. Të nderuar zotërinj, ai në punën e tij doli si kokosh. Sot po e shikoni, erdhi si pulë, i trembur nga frika e drejtësisë, nga frika e përballjes, për të fshehur të vërteten dhe sigurisht tregoi arrogancën e pushtetit.
