Dështimi i 15 pikave të “Kartës së parimeve të Aleancës për Shqipërinë Europiane”, e cila u nënshkruan katër vjet më parë, midis kryeministrit Rama dhe kryetarit të Kuvendit, Ilir Meta.
1 Prilli i vitit 2013, ishte dita kur krerët e PS-së dhe LSI-së, vendosen të bashkohen në koalicion kundër Partisë Demokratike të drejtuar nga Sali Berisha. Pikërisht atë ditë, Ilir Meta deklaroi divorcin me Sali Berishën duke i lënë atij të gjitha kostot e qeverisjes. Meta u largua si pa të keq, megjithëse LSI kishte kontribuar fort në degradimin e qeverisë Berisha, e cila në fund të mandatit të dytë, kishte një imazh të dërrmuar prej korrupsionit. Ilir Meta iu bashkua Edi Ramës që nuk kishte rreshtur së akuzuari atë, për katër vite duke nisur prej “bllokut me gishtat obez”… tek 21 Janari e të tjera ngjarje që tronditën shumicën Berisha-Meta. Ato akuza që u faktuan me dokumente e pamje filmike, u harruan shpejt nga Rama, i cili e priti me shumë “dashuri” Ilir Metën për të nënshkruar me të “Kartën e parimeve të Aleancës për Shqipërinë Europiane, PS-LSI”. Qysh në nisje u duk se kjo marrëveshje nuk do të kishte asnjë lidhje me parimet.
Kanë kaluar katër vjet dhe në fakt ka një bilanc të dhimbshëm të kësaj marrëveshje. Realiteti në Shqipëri është shumë larg premtimeve që dy liderët nënshkruan në marrëveshjen e tyre të parimeve.
Shqipëria është sot një ndër vendet më të korruptuara në botë dhe shumë herë më e korruptuar se në prill të vitit 2013, kur Rama e Meta nënshkruan marrëveshjen e tyre e u përbetuan se do të bënin një luftë të pashembullt kundër korrupsionit. Por, e kundërta ndodhi, sepse korrupsioni vetëm u shtua. Është fakt se niveli i lartë i korrupsionit është rritur në këto vite. Këtë e vërtetojnë të gjitha raportet ndërkombëtare që hulumtojnë nivelin e korrupsionit nëpër botë.
Ajo marrëveshje prodhoi Kuvendin më të inkriminuar në historinë e Shqipërisë, i paparë e dëgjuar më parë në historinë e vendeve demokratike. Është tashmë fakt që janë disa deputetë të larguar nga parlamenti për shkak të së shkuarës së tyre kriminale, ndërkohë që disa të tjerë janë nën hetim pikërisht prej kësaj të shkuare.
Është fakt se sot Shqipëria është vendi, ku lulëzon hashashi dhe për këtë ka raporte të institucioneve ndërkombëtare e të policive të vendeve fqinje, të cilat kanë kapur me qindra tonelata drogë që iu mbërrinte në vendin e tyre nga Shqipëria. Ka akuza ndërmjet ministrave e krerëve të dy partive lidhur me kanabizimin e Shqipërisë.
Është fakt se Shqipëria është vendi që po braktiset nga shtetasit e saj e veçanërisht nga rinia. Ka shifra të frikshme të azilkërkuesve shqiptarë që i kalojnë ato të vendeve ku ka luftë. Rinia shqiptare po ikën nga kjo Shqipëri e parimeve të Ilir Metës e Edi Ramës. Janë mbi 70 mijë shqiptarë që kanë tentuar të largohen nga Shqipëria vetëm dy vitet e fundit. Shumica e tyre kërkuan azil në Gjermani e vende të tjera të BE-së, ndërkohë që llotaria amerikane shënoi rekord vitin që shkoi, pasi u bënë pjesë e saj rreth 200 mijë shqiptarë. Pra, është fakt se 200 mijë shqiptarë duan të ikin nga Shqipëria dhe shumica e tyre janë të rinj. Ikin, sepse Shqipëria pas katër vitesh qeverisje nga Rama-Meta, është edhe më e varfër se sa ajo që la Berisha në 2013-n.
Sot, Shqipëria është vendi, të cilin e ka përfshirë kriza politike, megjithëse Rama e Meta e patën nënshkruar në pikën dy të parimeve të marrëveshjes së prillit, “garantimin e lirive e të drejtave të opozitës dhe krijimin e konsensusit sa më të gjërë…”
Më poshtë shfaqet fotografia e 15 pikave, parime të marrëveshjes Rama-Meta, e cila e ka origjinën në një ditë të shënuar, më 1 Prill, “ditën e rrenave”.
