Shefja e politikës së jashtme të Bashkimit Europian, tha në Uashington se shpreson që politikanët në Shqipëri të shfaqin unitet për zbatimin e reformës në drejtësi. Federica Mogherini, vizitoi kryeqytetin amerikan, për “të matur pulsin” e administratës së re amerikane në lidhje me çështjet e ndryshme ndërkombëtare, për të cilat bashkëpunojnë Shtetet e Bashkuara dhe Bashkimi Europian. Ajo tha në përgjigje të pyetjeve të Zërit të Amerikës se Ballkani Perëndimor ishte një nga çështjet që kishte ngritur në bisedat me zyrtarët amerikanë.
Zonja Mogherini tha që e kishte vlerësuar votën unanime për reformën në drejtësi duke e quajtur miratimin, “një hap historik për vendin”. Por, ajo tha se tani fokusi duhet të jetë tek zbatimi i saj.
“Natyrisht ajo që është e rëndësishme për ne është që i njëjti unitet dhe e njëjta vendosmëri të tregohen për zbatimin e reformës dhe kam besim që vendi mund ta gjejë forcën në institucione që ta bëjë një gjë të tillë, sepse e di se sa e rëndësi ka për shqiptarët kjo reformë. Ne të gjithë mendojmë se ajo është vendimtare për të ecur përpara në rrugën drejt integrimit në Bashkimin Europian”, tha zonja Mogherini, në përgjigje të një pyetje të Zërit të Amerikës në aktivitetin në Këshillin e Atlantikut.
Zonja Mogherini tha se rruga për integrimin e Shqipërisë është e hapur, nëse reforma zbatohet. Zonja Mogherini gjysmë me shaka iu referua marrëdhënieve të vështira politike në vend, duke shprehur shpresën që ajo të realizohet me një ndjenjë bashkimi kombëtar.
“E di që ky nuk është sporti i preferuar në Shqipëri, por mendoj se kur bëhet fjalë për interesin e qytetarëve, kjo është një domosdoshmëri.”
Zonja Mogherini tha që Ballkani Perëndimor ishte pjesë e bisedimeve të saj në Uashington gjatë vizitës së saj dyditore, ku ajo ka përcjellë mesazhin se për Bashkimin Europian, puna me Ballkanin Perëndimor është një përparësi kryesore.
“Për ne në Bashkimin Europian është thelbësor bashkëpunimi rajonal dhe nevoja që secili nga vendet e rajonit të ecë përpara në rrugën e reformës dhe përfundimisht të integrohet në BE”, tha zonja Mogherini.
Ajo shtoi se që kjo të realizohet, duhet një angazhim të vazhdueshëm në rajon dhe një vëmendje të vazhdueshme nga Bashkimi Europian.
“Mund të keni besim tek angazhimi im personal dhe i udhëheqjes së BE-së për vazhdimësinë e kësaj vëmendjeje dhe për përcjelljen e një vizioni të qartë në Uashington që të vazhdojë të jetë i përqendruar tek Ballkani Perëndimor në një mënyrë konstruktive. Shpresoj që mesazhi im të jetë dëgjuar.”
Zonja Mogherini u takua gjatë qëndrimit në Uashington me Sekretarin amerikan të shtetit Rex Tillerson, ndërsa të dyja palët po përpiqen të gjejnë fusha bashkëpunimi.
Synimi i zonjës Mogherini për takimin, ishte “matja e pulsit”, për të peshuar marrëdhënien europiane me administratën e re të Presidentit Trump, duke filluar me Sekretarin e Shtetit, Tillerson.
Shefja e Bashkimit Europian tha që takimi ishte i frutshëm dhe tha se BE e SHBA, kanë shumë çështje, për të cilat do të donin të bashkëpunonin ngushtë.
Por, në Këshillin e Atlantikut ajo e pranoi që në disa drejtime të rëndësishme si rrugët për zgjidhjen e krizës në Lindjen e Mesme, këndvështrimet për multilateralizmin, tregtinë dhe të drejtat e njeriut, krizën e emigracionit dhe refugjatëve, pikëpamjet mes BE-së dhe administratës së re janë të ndryshme.
Presidenti amerikan Donald Trump ka bërë tashmë të qarta disa prej qëndrimeve të tij, të cilat nuk janë një linjë me vendet e Bashkimit Europian, sikurse largimi i Britanisë nga Unioni apo qëndrimi i zbutur ndaj Moskës zyrtare dhe Presidentit Putin.
/zeriamerikes.com/
