Protesta e mbrëmshme e opozitës së bashkuar në Tiranë ka patur jehonë edhe në mediat ndërkombëtare.
BBC i ka dedikuar një hapësirë ngjarjes së djeshme në kryeqytetin shqiptar, duke përshkruar edhe me një video momente nga protesta.
“Mijëra shqiptarë protestojnë kundër kryeministrit Edi Rama, me disa bomba molotov në zyrën e tij. Gjatë tre muajve të fundit, ka pasur demonstrata anti-qeveritare në Shqipëri. Z. Rama përballet me akuzat për mashtrim zgjedhor dhe korrupsion. Lideri i opozitës, Lulzim Basha i bëri thirrje turmave të vazhdojnë protestat derisa zoti Rama të largohet nga pushteti”, shkruan BBC.
Ndërsa media italiane “RAI” raporton se mbi 1500 policë ishin mobilizuar për manifestimin e së shtunës.
“Godinat qeveritare ishin blinduar me forca policie. Edhe në demonstratat e fundit ka pasur përleshje mes protestuesve dhe policisë, të cilët përdorën gaz lotsjellës dhe ujë për të shpërndarë turmën. Dje, ambasada e SHBA në Tiranë u bëri thirrje mbështetësve të opozitës që “të refuzojnë dhunën gjatë protestës.” shkruan Rai ndërsa shton se prej shkurtit opozita ka braktisur parlamentin duke dorëzuar mandatet e deputetëve.
