Nga Ahmet Zani
Kjo ndërtesë mjaft e hershme ndodhet në kodrën e fshatit Ishëm dhe i kalon të 550 vitet. Kulla dykatëshe objekt i luftrave ndaj pushtuesit osman ka shërbyer si bazë e luftëtarëve të udhëhequr nga heroi kombëtar Skënderbe. Por, Beqir Kullaj, i cili për vite e ka ruajtur dhe mirëmbajtur kullën e ngritur nga të parët e tij është i zhgënjyer nga mospërfillja e institucioneve shtetërore. Kjo ndërtesë është lënë në harresë prej tyre, madje tashmë kjo duket se ka humbur tërësisht. Beqir Kullaj, i shqetësuar për këtë vepër të rëndësishme arti, thotë se specialist të ndryshëm kanë evidentuar këtë “kështjellë” dhe janë mahnitur nga përbërja dhe struktura e saj si dhe qëndresën më se 550 vjeçare të saj në sfidë me kohën.
Banorët e fshatit të vogël Ishëm të Durrësit, fshat diku 15 km nga Fushë Kruja e njohin mirë këtë ndërtesë disa shekullore me histori të veçantë. Djali i Beqir Kullës thotë se shumë njerëz kanë abuzuar me ndërtesën që ruhet vetëm prej familjes së tij. Në të ka 25 vjet që shteti nuk hedh asnjë lek përkujdesje, megjithatë ka mjaft pasuri brenda kullës.
Mbetet për t’u parë nëse shteti do të vazhdojë të jetë ende shurdh, sepse atë që nuk e bënë pushtuesit me këtë kullë, mund ta bëjë harresa. Historia e saj shekullore mund të rrënohet përfundimisht, sepse ata që merren me monumentet e kulturës flenë gjumë të thellë.
