Sekretarja e Partisë për Drejtësi, Integrim dhe Unitet, Mesila Doda, e ftuar në emisionin Pressing, ka deklaruar se Kosova ka emra të shkëlqyer që do të mund të ishin pjesë e qeverisë së Shqipërisë por sipas saj Edi Rama po shet propagandë për të treguar se unë bëj ndryshim.
“Mendoj se po vazhdon të shet propagandë. Kosova ka emra të shkëlqyer që do të ishin pjesë e qeverisë së Shqipërisë, problemi është se marrin persona vetëm e vetëm për të treguar se unë e bëj ndryshimin e madh” tha ajo.
Doda gjithashtu shtoi se ky është mesazh jo i duhur, për shkak se njerëzit nuk duhet të besojnë se një njohje do të ju ngritë në karrierë.
“Besoj që njerëzit nuk mund t’i ngrejë në karrierë një njohje e caktuar” tha ajo duke shtuar se “puna gjatë tërë jetës” duhet të jetë rruga e duhur.
Ish-deputetja shtoi se ky veprim është i një lloj mentaliteti feudalist, duke thënë se nuk është me rëndësi se kush e solli atë në pushtet (duke iu referuar Baton Haxhiut i cili thuhet se e ka propozuar Gent Cakajn për ministër të punëve të jashtme të Shqipërisë) nuk mund të funksionojë politika me takime private.
“Kjo është shprehje e mentalitetit feudalist, çka ka lidhje kush e sjell por nuk mund të funksionojë politika me bajraqe, dreka e darka, duhet në bazë të meritës, politikanët bëhen çdo ditë, me mund e me gabime”, tha Doda.
Doda gjithashtu shtoi se edhe vetë Partia Socialiste është e përjashtuar nga qeveria dhe se nuk e di se kë e përfaqëson.
“Edhe Partia Socialiste është e përjashtuar nga qeverisja. Është qeveri që nuk di se kë përfaqëson, nuk ka ngelur asnjë socialist që ndihet i përfaqësuar” shtoi ajo.
