Një nga futbollistët më të rëndësishëm të Kombëtares tonë, Elseid Hysaj, është dëmtuar gjatë ndeshjes ndaj Austrisë dhe tekniku De Biazi e ka lejuar të largohet nga grumbullimi. Mbrojtësi i lindur në Shkodër po kalon një formë të shkëlqyer tek Napoli, skuadra që vazhdon të tentojë titullin e madh në Serinë A, ndoshta edhe për shkak të problemeve fizike nuk ishte ai i zakonshmi në “Ernst Happel” të Vienës. Sipas shtypit vendas dhe të huaj edhe krahu i djathtë i skuadrës tonë ishte katastrofë dhe të kesh një si Hysaj në atë pozicion dhe të marrësh këtë etiketim është disi e pazakontë. Sidoqoftë, tashmë futbollisti është kthyer në Itali për një ekzaminim më të specializuar. Ndërkohë që Hysaj nuk do të jetë i vetmi që De Biazi do t’i gjejë një zëvendësues për miqësoren e radhës në Luksemburg, pasi parashikohen edhe ndryshime të tjera në formacion, duke mbajtur në stol edhe futbollistë që fizikisht janë të shëndetshëm, por që nuk po përgjigjen në fushë. “Në ndeshjen e parë nuk shkuam mirë dhe ju mund ta vlerësoni edhe vetë. Por ai takim ishte thjeshtë një test eksperimental, për të parë disa alternativa”, tha trajneri pas takimit dhe sigurisht që tani i ka idetë shumë më të qarta.
