Nga Klodian Tomorri
Rama ka një taktikë bajate që e përdor sa herë është në pozitë të vështirë. Hap sherr me gazetarët dhe në çdo rast e bën qëllimisht.
Këto tre ditët e fundit kanë qenë ndoshta ditët më të errëta për prespektivën europiane të Shqipërisë. Kryeministri jo vetëm që u kthye me duar bosh nga Sofia, por atje mori dhe një mesazh ogurzi; antarësimi i Shqipërisë në Bashkimin Europian tani nuk është më i sigurtë.
Nuk bëhet më fjalë për vonesë apo zgjatje të procesit të antarësimit. Tani është vënë në dyshim, vetë fakti nëse Shqipëria do të jetë ndonjëherë anëtare e BE. Kjo s’ka ndodhur asnjëherë më parë.
Samiti i Sofies ishte një dështim total. Sigurisht që përgjegjësi kryesor në këtë anë është Edi Rama.
Flirti i qeverisë me krimin, përzierja e drejtëpërdrejtë e ministrave dhe policisë në trafikun e drogës, mungesa e vullnetit për të vendosur shtetin ligjor, sigurisht që do kishte faturë edhe në Bruksel. Të rëndë madje. Aq sa tani po duan të na e kthejnë kokën prapë nga Lindja.
Por për hir të së vërtetës, Rama nuk është përgjegjësi i vetëm. Bashkë me të janë dhe një tufë hipokritësh, që sot qeverisin nëpër Europë.
I pari është Emmanuel Macron. Presidenti i Francës është tipiku i politikanit hipokrit. Një muaj më parë shkoi gjithë pompozitet në senatin amerikan për të shpëtuar botën nga rreziku Trump.
Me petkun e heroit foli atje se si proteksionizmi dhe politika e izolimit janë armiqtë më të mëdhenj të botës së lirë demokratike. Një muaj muaj më vonë, ky që kritikoi politikat proteksioniste të Trump është bërë përfaqësuesi kryesor i rrymës së proteksionizmit dhe mbylljes në Europë.
Me një hipokrizi tipike majtiste deklaroi se 15 vitet e fundit, politika e zgjerimit e ka dobësuar Europën. Dmth Europën sipas këtij e paska dobësuar Rumania, Bullgaria dhe Kroacia dhe sot rreziku më i madh i saj qenka Shqipëria.
Ky është presidenti francez, pasardhës i Zhak Shirakut dhe Fransua Miteranit.
