Kjo mund të jetë një hakmarrje për Brexit.
Kështu shkruan gazeta britanike “Daily Mail”, e cila është vënë në kërkim të “Pacientit Zero”, njeriut që e solli koronavirusin deri në nivelet më të larta të qeverisë britanike.
I prekuri më i rëndësishëm nga infeksioni është vetë kryeministri, Boris Johnson.
Po kush mund ta ketë infektuar? Këtu gazeta bën një investigim dhe thotë se virusi mund të ketë ardhur nga kryenegociatori i BE për Brexit, Michel Barnier.
Ky i fundit u takua më 5 mars me David Frost, kryenegociatorin e Britanisë për Brexit.
Më 19 mars, Barnier tha se është testuar pozitiv për koronavirus.
Një ditë më vonë, Frost hyri në vetëizolim me simptoma të buta. Ai u bë i pari person në rrethin e ngushtë të kryeministrit Johnson me koronavirus.
Menjëherë, të tjerë zyrtarë të lartë nisën të punojnë nga shtëpia.
Dy ditë pas nuk u ndje mirë, dhe një ditë pasi testi e konfirmoi pozitiv, Johnson nisi të drejtojë vendin nga vetëizolimi.
