“Rama po shtrëngon lakun dhe shikon sa mbajnë shqiptarët, kur nuk mbajnë më u bie kokës, u tregon kërbaçin.”
Sipas gazetarit Enkel Demi, kjo është politika që po ndjek Rama, e cila u pa qartësisht me sjelljen që pati ndaj protestuesve kuksianë. I ftuar në emisionin “Provokacia” të gazetarit Mustafa Nano, Demi theksoi se Rama ka instaluar një sistem dhune që vijon ta përforcojë pa iu trembur askujt.
“Një kryeministër as nuk dhunon, e as nuk vret me telefonin e tij. Qëndrimi që mban një qeveri ndaj “aparatit të dhunës“ duke e përkrahur e bën policin të dhunshëm. Rama e ka shpikur rezistencën opozitare të djegies së gomave…”, tha ai.
Qeverinë e Ramës, Demi e cilëson pushtet të komunistëve. Ai thekson se në qeveri janë të gjithë çunat e sekretarëve të Komitetit dhe Sigurimit të Shtetit, duke sjellë në vëmendje edhe debatin shumë të ndezur të ditëve të fundit mbi Kampin famëkeq të Tepelenës.
“Pse Fatmir Xhafa është i vetmi sekretar rinie ministër i Brendshëm? Pse Kryetarin e Kuvendit të Shqipërisë e kemi ish-ministrin e Brendshëm dhe ish- sekretarin e Tepelenës? Përse sot për herë të parë pas 27-vjetësh diskutojmë që në Tepelenë nuk është bërë ndonjë gjë e madhe dhe po bëjmë edhe pastimin e figurës së komunistëve? Pse janë vetëm këta që e kanë babain o anëtar komiteti, o anëtar byroje, ose drejtor të Sigurimit të Shtetit. Shiko kë ka në qeveri pse janë të gjithë çunat e sekretarëve të komitetit? Pse nuk është një njeri që nuk ka lidhje me regjmin?”, tha Demi.
Demi thotë se tanimë që Rama ka pushtetin absolut i shikon njerëzit si miza, ndërsa shpjegon se indiferenca lejon dhunën që mund t’i ndodhë secilit prej nesh në të ardhmen e afërt.
“Rama për herë të parë u përball drejtpërdrejtë me pupullin te Armët Kimike, po ndryshe nga tani nuk ishte guximtar. Sot, Ramën po e mbyt pushteti që ka në dorë, po e mbyt vetvetja, nuk di ta administrojë. Edi Rama është gjeni i intrigës dhe i politikës në Shqipëri. Rama është i dhunshëm, sepse në mënyrë të dhunshme po imponon politikat. Me Kukësin doli zbuluar, tha që nuk e konsultova dhe bëra gabim. Si mund të vësh gjithë këtë taksë pa e konsultuar? Kjo tregon se Rama i ka njerëzit miza, nuk i pyet fare… Ismet Drishtit i çoi 15 veta. Kur Ismet Drishti i tha policisë po më sulmojnë televizionin i ka çu 2 policë në këmbë gjysmë ore më vonë. Kështu fillon dhuna, sot Ismeti, nesër unë, pasnesër kuksianët, kështu do ta pësojmë…”, tha Demi.
