Nëse futbolli shqiptar ende e ka një lloj kuptimi, sigurisht që një pjesë të mirë të arsyes e përbën fakti që herë pas here luhet ndonjë derbi midis Partizanit dhe Tiranës. Ky i së premtes është pothuajse gati. Mungon vetëm emri i arbitrave, një element shumë i rëndësishëm, aq më shumë për takime të këtij niveli, të cilët shkallën e vështirësisë e kanë shumë të lartë. Drejtuesit e Partizanit kanë deklaruar se nuk kanë asnjë preferencë, përveç faktit që duhet një arbitër me eksperiencë, ndërsa asistentët është pothuajse e sigurtë që do të jenë me stemën e FIFA-s. Ndërkohë që Tirana ka shpallur “non grata” Klajdi Kolën, tashmë të pezulluar dhe Enea Jorgjin nëpërmjet një shkrese zyrtare drejtuar FSHF-së. Në fakt, kërkesa të tilla nuk merren parasysh nga institucioni që drejton futbollin në vend, por gjithsesi mund të ndikojnë në ndeshje kaq specifike. Meqenëse edhe gjyqtari tjetër i FIFA-s, Bardhyl Pashaji është i pezulluar, në balotazh mbeten Lorenc Jemini dhe Kridens Meta nga kolegjumi i Tiranës. Tashmë duhet pritur edhe diçka më shumë se 24 orë, për të mësuar përfundimisht emrat e gjashtë arbitrave të derbit.
