Kryetari i Partisë Demokratike Lulzim Basha tha se Shqipëria po qeveriset nga një Kryeministër i bërë njësh me krimin e organizuar.
I pranishëm në çadrën ku prej 37 ditësh po vijon protestën opozita e bashkuar, Basha ripërseriti kërkesat për krijimin e një qeverie teknike dhe largimin e Edi Ramës.
Gjithashtu Basha tha se beteja për zgjedhje të lira e të ndershme i bashkon shqiptarët kudo ku jetojnë. Nga fitorja e kësaj beteje sipas Bashës, fitojnë të gjithë shqiptarët dhe kjo është një betejë për dinjitetin e kombit shqiptar.
Më tej kryedemokrati tha se Partia Demokratike dhe aleatët e saj kanë mbështetjen e Amerikës dhe Europës.
“Beteja për zgjedhje të lira e të ndershme i bashkon qytetarët. Prandaj Amerika dhe Europa janë me ne deri në fitore. Duhet të çlirojmë Shqipërinë nga tirania. Perëndimi dhe Uashigntoni e dinë të vërtetën që Shqipëria qeveriset nga një kryeministër i bërë njësh me mafien,” tha Basha.
