Kryetari i Partisë Demokratike, Lulzim Basha është shprehur sot nga çadra ku janë të vendosur protestuesit se mbështetja ndërkombetare për protestën e opozitës po rritet nga momenti në moment.
“Këtë shesh e keni pagëzuar dje si sheshin e lirisë dhe demokracisë, shpresës. Konsensusi qytetar po rritet nga momenti në moment. Mbështetja nga ndërkombëtarët po rritet nga momenti në moment. Zgjedhje të lira dhe të ndershme, zgjedhje dhe një qeveri teknike që do të garantojë votën e lirë të qytetarëve”, tha Basha.
Gjithashtu Basha tha: “Fitorja do të jetë fitorja juaj, fitore e çdo shqiptare. Nuk jemi mbledhur këtu për kauzën e Bashës apo PD-së, por për kauzën e çdo shqiptari të ndershëm. Kjo i ka dhënë kauzës sonë një forcë të papërballueshme”.
Më tej kreu i PD-së e quajti çadrën e mbushur me protestues hapësirën e parë të lirisë së re që po vjen, sipas Bashës, të demokracisë së standardit europian ku qytetarët nuk kanë frikë të thonë të vërtetën..
“Ku jemi sot këtu, jemi në hapësirën e parë të lirisë së re që po vjen, të demokracisë së standardit europian, ku qytetarët nuk kanë frikë të thonë të vërtetën. Ky është sheshi nga ku nisim projektin e jetës sonë, demokracinë dhe fitoren e çdo qytetari”.
Ndërkaq Basha akuzoi kryeministrin Edi Rama se në këto 4 vite ka ndërtuar një parlament fasadë, një demokraci fasadë.
“Përballë nesh kemi një fasadë, një fasadë nga mjeshtri i fasadave, i cili gjithë jetën e tij është shquar për fasada. Fasada dhe bojë përpara, rrëmujë kaos dhe varfëri nga prapa. Ky ka qenë realiteti i fasadave të shpëlara dhe të dala boje. Në këto 4 vite ka ndërtuar një parlament fasadë, një demokraci fasadë. Një parlament fasadë i cili nuk përfaqëson popullin shqiptar. Një parlament fasadë i cili nuk përfaqëson popullin shqiptar dhe nuk përfaqëson asnjë shqiptar të ndershëm, por një grusht pushtetarësh të lidhur me krimin. Demokraci fasadë, arsim fasë, bujqësi fasadë. Prapa fasadash janë një pakicë që i thonë shumicës të heshtë. Prapa fasadës është pakica që është pasuruar dhe shqiptarëve që ta qepin. Karvani i pakicës ka shkatërruar jetën e shqiptarëve. Prandaj jemi sot këtu si 27 vite më parë. Shqiptarët u ngritën dhe thanë jo pluralizëm fasadë, ata rrëzuan pluralizmin fasadë. Sot detyra jonë më e madhe është t’i japim fund demokracisë fasadë dhe zgjedhjeve fasadë, që nuk bëhen për të zgjidhur problemet tuaja por për një grusht njerëzish që mjelin buxhetin e saj që të pasurohen vetë”, tha ndër të tjera Basha
