Shansi i fundit, largimi i Prengës dhe kalimi i akteve të Dekriminalizimit
Kryetari i PD-së, Lulzim Basha i është drejtuar me një sërë kushtesh Kryeministrit Edi Rama, duke i cilësuar si shansi i fundit që i jep opozita. Nëse kushtet nuk plotësohen Basha paralajmëroi bojkot pasi ështe e pamundur që në kushtet aktuale të kemi funksionim normal të Kuvendit.
Në një deklaratë për mediat pas mbledhjes së grupit parlametar të PDsë, Basha renditi si kushte të opozitës largimin nga Kuvendi të Armando Prengës, miratimin e akteve të Dekriminalizmit në seancën plenare të së enjtes, miratimin po në këtë seancë të largimit të deputetëve Koço Kokëdhima, Valentina Leskaj dhe Rakip Suli, që sipas kreut të demokratëve kanë përfituar nga pasuritë publike në shkelje të kushteve të mbajtjes së mandatit të deputetit. Basha ka akuzuar kryeministrin Rama se ka strehuar në kupolën e PS kriminelë. “Armando Prenga që derdhi gjak qytetarësh të pafajshëm në komisariatin e Laçit në vend që të mbahet në burg shpërblehet dhe rikthehet në Kuvend nga Rama. Kemi kriminalizim të shpejtë të PS, kthimi në klan kriminal që drejtohet nga Rama, këto janë zhvillime që thërrasin për një gjykim dhe aksion mbarëpopullor që nuk kufizohet vetëm te PD dhe opozita” tha Kryetari i PD-së, Lulzim Basha.
Sipas Bashës, përballja me këtë regjim është dhe do jetë e gjithanshme, në Kuvend e jashtë tij. “Në Kuvend me këtë regjim do të nisë të enjten me një sërë kushtesh mosplotësimi i të cilave do të cojë në pamundësinë e funksionimit të Kuvendit”, ka deklaruar Basha.
