Armando Prenga nuk e ka fshehur zhgënjimin ndaj shokut të tij Ben Blushi. Pas deklaratave të këtij të fundit që ka ardhur koha që PS t’i kërkojë falje njerëzve për ata se çfarë ka futur në parlament, deputeti i Kurbinit ka reaguar pa e fshehur zhgënjimin. Ai rrëfen se me Blushin kanë qenë shokë tavolinash në dreka e darka, madje ky i fundit i ka kërkuar bashkëpunim për të rrëzuar Ramën.
“Nuk më habit Sali Berisha as Lulzim Basha. Më habit Ben Blushi, se kam ndarë bukën me të dhe e kam njohur për shok të mirë. S’e kam dëgjuar kurrë të flasë për kriminelë në PS, kur vinte të darkonte e të drekonte me mua në zonën time. Por. mesa duket puna sot ia do që të sulmojë shoket njësoj si Saliu dhe Luli! Prandaj është gati të më bëjë kriminel edhe mua shokun e tij për qëllimet e veta.
Unë s’jam kriminel o Blush! Unë jam ai që të kam respektuar dhe të kam thënë mik. Të mirëkuptova që nuk e the gjysëm llafi për mua, kur më përjashtuat pa marrë mundimin as të pyesësh si më zuri ky hall. Por, kur të dëgjova sot më erdhi zor që kam nda bukë me ty dhe dua ta dinë të gjithë që me kë ardhë e më je lutur për të luftuar Edi Ramën. Po, s’isha kriminel atëherë se të duhesha ty. Tani ke gjet statutin dhe unë të bëj punë si kriminel jo si shok. Mjerë PS që do t’i dalësh ti për zot”, shkruan Prenga.
