“Rama e Basha ish-emigrantë që duan të përzënë shqiptarët nga vendi”
Pas akuzave të sinkronizuara mes PD-PS ndaj Lëvizjes Socialiste për Integrim, ku u përdor termi “shushunja”, ka reaguar presidenti i zgjedhur Ilir Meta.
Gjatë një takimi me simpatizantë të LSI në Lushnje, ai tha se timonieri i lodhur shantazhon njerëzit me votë për të mbajtur në punë shushunjat e koncesioneve.
“Timonieri i lodhur e ka mendjen vetëm te karrigia e tij, ndërkohë populli largohet. Kjo është arroganca e tij. Erdhi fundi i kapitenit të kanabisit, që shantazhon njerëzit për votë për të mbajtur në punë shushunjat e koncesioneve”, u shpreh Meta.
Meta tha se politikat e ndjekura kanë bërë që 56% e shqiptarëve të mendojnë largimin nga Shqipëria, ndërsa Ramën e Bashën i cilësoi si dy liderët që duan t’i përzenë.
“Dy ish-emigrantë duan të përzënë shqiptarët duan të bëjnë një marrëveshje për të vazhduar të marrin si shushunja koncesionet, nga shëndetësia te burimet natyrore. Njerëzit duan të ikin nga Shqipëria, sikur thoshte edhe ‘Gallupi’ pasi sikur shkruante edhe Dritëro Agolli në 1994 kur Saliu i parë u çmend kur donte të merrte një tepsi të madhe”, u shpreh Meta.
Meta e cilësoi Shqipërinë si vendin më të bukur në botë dhe u bëri thirrje të rinjve që të mos e braktisin.
“I bëj thirrje 600 mijë të rinjve dhe të rejave të mos u shkojë mendja të largohen nga vendi më i bukur në botë”, tha ai.
Vasili: Rama-Basha karagjozë që kanë një tepsi që duan ta hanë bashkë
Ndërsa kreu i LSI Vasili i ka quajtur karagjozë dyshen Rama-Basha, duke thënë që kanë një tepsi që duan ta hanë së bashku.
“Jemi këtu për t’u dhënë përgjigje përfundimtare këtyre dy karagjozëve. Këta kanë një tepsi që duan ta hanë së bashku, 25 qershori na ndan njëherë e përgjithmonë nga këta. Në 25 qershor ndahemi nga ditët e zeza” deklaroi ai.
