Të hënën në Kinë miqësorja Junaitid – Siti, trajneri katalanas qetëson situatën: “Jemi njerëz të civilë”
Mbërrin edhe derbi i parë i Mançesterit, me Jose Murinjon dhe Pep Guardiolën në krye të pankinave. Ndeshja do të luhet në kuadër të “International Champions Cup”, një turne miqësor veror dhe do të zhvillohet të hënën në stadiumin e famshëm, “Foleja e Zogut” në Pekin. Por ajo që ka ngjallur interesin e mediave, por edhe të publikut në përgjithësi, është se si do të sillen dy teknikët, të cilët në krye të Realit dhe Barcelonës kishin marrdhënie pothuajse armiqësore. “Sigurisht që ne jemi njerëz civilë”, thotë Guardiola në prag të takimit me Murinjon. “Pse mendoni se ai nuk do të ma shtrëngojë dorën? Nuk ka asnjë arsye. Ai kërkon të fitojë dhe unë gjithashtu, kjo është e gjitha. Por do të jetë një ndeshje miqësore, një miqësore e vërtetë”. Sipas trajnerit katalanas, Murinjo do t’i kthejë mançesterit të tij personalitetin e skuadrës së Aleks Ferguson. “Eshtë ende shpejt se çfarë Junaitid do të shohim, por jam i bindur se do të jetë shumë më i fortë se ai i sezoneve të fundit”. Ndërkohë “bookmakers” kanë nxituar të nxjerrin edhe favoritët. Kështu Siti është në avantazh të lehtë dhe fitorja i kuotohet me koeficientin, 2.75 për fitoren e Junaitid dhe 3,20 barazimi.
