Nga Luljeta Progni
Një garë e vërtetë është zhvilluar sot mes kryebashkiakut Erion Veliaj dhe ministrit të Brendshëm, Saimir Tahiri. 1 Qershori, festa e fëmijëve është marrë shumë seriozisht nga të dy palët. Erion Veliaj e kishte parapërgatitur këtë festë pasi kishte paralajmëruar, se pikërisht më datë 1 qershor, do të inaguronte parkun e shumëpërfolur të fëmijëve. Për ndërtimin e këtij parku lojrash u bë shumë zhurmë, e cila përfshiu mjaft aktorë, duke nisur nga shoqëria civile e deri tek Presidenti Bujar Nishani.
Do të ishte pikërisht kjo ditë dhe fasada e bukur e parkut të lojrave, moment kur Erion Veliaj do t’i sfidonte të gjithë skeptikët e këtij projekti. Veliaj kishte përgatitur shfaqjen e radhës, me të gjitha detajet, ashtu siç di vetëm ai të përgatisë “show” të tilla. Në fakt ky është modeli që ka injektuar tek Veliaj e të tjerë, kryeministri Edi Rama. Erion Veliaj dhe stafi i tij ishin veshur me bluzën e një personazhi të njohur për fëmijë: “Toy Story”.
Por, festa e Erjonit nuk e mori të gjithë vëmendjen. Nuk paska qenë e thënë, që ai të jetë i vetmi sot në qendër të vëmendjes për t’ia “plasur në surrat” të gjithëve parkun e bukur të lojrave për fëmijë. Në të njëjtën kohë kur inagurohej parku i lojrave tek Liqeni, një tjetër festë në krahun tjetër të Tiranës ka tërhequr ndjeshëm vëmëndjen e publikut dhe mediave. “Çunat” e Saimir Tahirit të veshur si Spiderman e Batman kanë dhuruar një spektakël të paharruar për fëmijët e spitalit pediatrik në kryeqytet.
Me kostumet e personazheve më të dashur për fëmijë, ata kanë habitur vërtet pacientët e vegjël, duke iu dhuruar atyre një ditë të bukur për festën e fëmijëve. Spektakli i “çunave” të Saimirit ka nisur herët në mëngjes, kur efeketivë të policisë kanë pozuar përballë kamerave e aparatëve fotografikë duke iu dhuruar fëmijëve logon e policisë së shtetit, “Ti je heroi im”.
Festa është finalizuar në spitalin e fëmijëve. Vetë Tahiri ishte bashkë me “çunat“ e tij pranë fëmijëve të sëmurë atje ku shfaqja bën më efekt se sa në një kënd lojrash që u përfol kaq shumë. Duket se ”heronjtë” e Tahirit, që hidheshin me litar nëpër dritaret e fëmijëve të sëmurë, e kanë mundur personazhin në Bluzën e Veliajt mes gjelbërimit plastik në parkun e liqenit. Përballë personazheve të njohur për fuqinë e tyre mistike, si Batman e Spiderman, personazhet e Toy-Story, duken kaq të brishtë, edhe pse një prej tyre është “Sherif”.
Kështu përmes lojës me kukulla, e konfirmuan edhe një herë garën mes tyre çunat e Edi Ramës. Kjo garë ka nisur herët, kur Rama do të duhej të zgjidhte mes tyre për postin e kryetarit të Bashkisë Tiranë, në pranverën e vitit 2015. Gara ka vazhduar edhe me procesin e zgjedhjeve në parti, ku Tahiri e Veliaj u investuan fort për të përfshirë në listën e forumeve drejtuese të kësaj partie njerëzit e tyre të afërt.
Beteja e radhës e dy çunave të Edi Ramës në skenën e 1 qershorit, ishte e turpshme. Duke përdorur festën e fëmijëve, i treguan dhëmbët njëri-tjetrit, të vendosur në role e në një garë qesharake. Dhe kjo është e natyrshme, pasi ata vijnë si produkt i propagandës, që sot është komardarja e vetme për mbijetesën e qeverisjes së “Rilindjes”.
