Mesila Doda: Mos prekni Kushtetutën që të bjerë ndesh me Kodin e familjes. Nuk preket Kushtetuta për të prishur familjen. Kushtetuta preket vetëm për reformën në drejtësi”
Kryetari i PDIU-së Shpëtim Idrizi, ka reaguar ndaj zërave kritikë kundër qëndrimit të ambasadorëve të SHBA-së dhe BE-së për reformën në drejtësi. Gjatë një takimi me strukturat në Lezhë, Idrizi tha se janë politikanët shqiptarë ata që kanë kaluar vijën e kuqe dhe jo ambasadorët e SHBA-së e BE-së, Donald Lu e Romana Vllahutin.
“Politikanët e këtij vendi kane 25 vjet që e kanë kaluar vijën e kuqe me shqiptarët. Boll më! Shkoni e votoni reformën në drejtësi! Nuk e kaluan vijën e kuqe ambasadorët, por janë politikanët shqiptarë ata që e kanë shkelur me kohë vijën e kuqe.”
Kreu i PDIU-së përsëriti qëndrimin e kësaj partie unanim për të votuar reformën në drejtësi dhe i bëri thirrje palëve në politikë, të lënë mosmarrëveshjet dhe të votojnë me urgjencë reformën në drejtësi.
Ndërsa ligjvënësja PDIU-së, Mesila Doda foli, për ndryshimet në Kushtetutë duke i kërkuar politikës të jetë e kujdesshme në ndryshimet që bën.
“Mos prekni Kushtetutën që të bjerë ndesh me Kodin e familjes. Ne mbrojmë familjen dhe martesa është vetëm mes një burri dhe një gruaje. Nuk preket Kushtetuta për të prishur familjen. Kushtetuta preket vetëm për reformën në drejtësi”, tha Doda.
Deputeti Aqif Rakipi, tha se PDIU është parti kombëtare dhe se do të ketë deputetët e saj në shumë zona.
“ Jemi po aq të mëdhenj si në Jug dhe në Veri. Lezha do të nxjerrë deputetin e saj. Nuk ka pse të ketë Lezha deputet nga Tirana, por duhet një njeri nga Lezha si Zef Doçi”, tha Rakipi.
