Ka than' i moçmi: 

"Shqiptarët tregojnë çka s'duhet, e fshehin atë çka e di e tërë bota."

- At Gjergj Fishta   

“Gjeneralët” e Ramës që do të drejtojnë fushatën e 2017

Nga Media 0

Ngrihet shtabi elektoral i Partisë Socialiste, për fushatën e zgjedhjeve të ardhshme parlamentare

Partia Socialiste ka nisur organizimin për zgjedhjet parlamentare të vitit 2017. Është ngritur shtabi themelor elektoral i PS-së, në të cilin bëjnë pjesë 6 koordinatorë në rajone, 12 koordinatorë në qarqe dhe koordinatorë për 61 bashki.  Sipas skemës së organizimit të fushatës, kryeqyteti i është besuar ministrit të Brendshëm, Saimir Tahiri, i cili ruan ende detyrën e kryetarit socialist të Tiranës. Në Vorë do të jetë Hekuran Brahimaj, në Kamëz Ramadan Cani, në Kavajë Gentian Daja dhe në Rrogozhinë, Haxhi Memolla.

Sekretari i Përgjithshëm i PS-së, Gramoz Ruçi nuk do të lëvizë nga zona e tij elektorale, të paktën në këtë fazë të procesit. Ai do të jetë drejtues politik në Qarkun e Fierit. Ruçi do të punojë në Fier me kryetaren e PS-së Gentiana Cakrani, në Patos me Klajdi Alisinanin, në Roskovec me Maksim Gogën, në Mallakastër me Mbarime Isufajn, në Lushnjë me Lindita Buxhelin, ndërsa në Divjakë me Agim Makën.

shtabi-elektoral

Taulant Balla forcon pozitat e tij në Elbasan, duke u konfirmuar në qendër të qarkut dhe me shumë gjasë do të kryesojë këtë listë që në vitin 2013 drejtohej nga Ben Blushi, tashmë i larguar nga PS.

Balla do të punojë në Elbasan me Ardit Demirin, në Gramsh me Klodian Taçen, në Librazhd me Elvira Poçin, në Përrenjas me Haxhi Çollakun, në Peqin me Edurim Teqjan, në Belsh me Mareglen Balin, ndërsa në Cërrik me Gëzim Sallën.

Vangjush Dako është i vetmi kryebashkiak që do të jetë në krye të një qarku si drejtues politik. Ai është i pari i shtabit elektoral në Durrës dhe e bën enigmatik faktin se kë ka menduar Edi Rama për të kryesuar listën në këtë zonë. Dako, po ashtu është anëtar kryesie në PS. Dako do të bashkëpunojë në Durrës me kryetarin Luan Zaza në Shijak, me Elton Arbanën dhe në Krujë me Ilir Locin.

Damian Gjiknuri, i cili bëri një punë të lavdërueshme nga partia e tij për zgjedhjet në Dibër, është dërguar në një terren të vështirë elektoral. Ai do të drejtojë ekipin në Vlorë, duke shmangur kështu Koço Kokëdhimën nga zona e tij e fundit e ekskluzivitetit.

Ai do të punojë në Vlorë me Anduel Tahirin, në Selenicë me Nertil Bellajn, në Delvinë me Brunilda Meleqin, në Sarandë me Jonida Abdulin, në Finiq me Vangjel Kaçin, ndërsa në Konispol me Hristo Mallanezo. Po ashtu, është konfirmuar në krye të Qarkut Gjirokastër, ministri i Çështjeve Vendore, Bledi Çuçi.

Ky i fundit e kishte marrë këtë detyrë qysh kur Kokëdhima humbi mandatin e tij prej deputeti. Çuçi do të punojë në Gjirokastër me Flamur Golemin, në Libohovë me Arnisa Ibrahimin, në Dropull me Dhimitër Tolis, në Tepelenë me Arben Gumenin, në Përmet me Adelina Janollarin, në Këlcyrë me Hodjan Selmanin dhe në Memaliaj me Edmonda Harizin. Zëvendëskryeministri Niko Peleshi ka forcuar pozitat e tij Korçë, duke ruajtur peshën politike, pavarësisht ambicjeve të dy deputetëve të tjerë të rëndësishëm që pretendonin të drejtonin këtë strukturë.

Ministri i Jashtëm, Ditmir Bushati do të vijojë të drejtojë strukturat e PS-së, në vendlindjen e tij, në Shkodër, ndërsa ministri i Mirëqenies Sociale, Blendi Klosi do të drejtojë ekipin e punës në Berat.

Nuk ka asnjë të papritur sa i takon ministres së Arsimit, Lindita Nikolla, e cila do të ruajë po ashtu detyrën e saj si koordinatore në Lezhë. Nuk ishte e pritshme detyra e besuar ministres së Mbrojtjes, Mimi Kodheli, e cila nga delegimi i Lezhës, iku në Vlorë, e tani do të shkojë në Dibër.

Po ashtu, ministri i Shëndetësisë, Ilir Beqja do të jetë në një qark që nuk e bashkon tradita e angazhimeve të mëparshme të tij politike, në Kukës. Bashkëpunëtorët në çdo bashki për Bushatin, Klosin, Nikollën, Kodhelin dhe Beqajn, janë sipas tabelës.

Pak kohë më parë, Edi Rama saktësoi fillimisht se cilët do të ishin drejtuesit politikë të 12 qarqeve të vendit, të cilët, me gjasë do të kryesojnë dhe listat elektorale të këtyre qarqeve.

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>