Pas rreth një ore kohëzgjatje, ka përfunduar takimi në ambientet e KQZ-së mes ambasadores së SHBA-së, Yuri Kim, me përfaqësuesit e partive politike në vend dhe kreut të KQZ-së. Në takim kanë marrë pjesë Damian Gjiknuri, Monika Kryemadhi, Jorida Tabaku dhe Ilirjan Celibashi.
Mësohet se tema për të cilën u diskutua lidhej me financimin e partive politike në Shqipëri, duke ndjekur zhvillimet e fundit, ku “Zëri i Amerikës” publikoi një lajm me pretendimin se PD kishte marrë 500 mijë dollarë financime nga rusët gjatë vitit 2017.
Pas përfundimit të takimit, ambasadorja amerikane nuk pranoi të jepte asnjë prononcim për mediat lidhur me tematikat e diskutimit.
