Tentohet penalizimi i PDIU-së, megjithëse ka një mijë vota më shumë se të gjitha partitë e tjera për një mandat. Në shkallë vendi, PDIU-së i mbeten 40 mijë vota të papërfaqësuara.
Sa vjen e bëhet më e dukshme që ka një qëllim të keq për ta dënuar me çdo mënyrë përfaqësimin e PDIU-së së Tiranës në Kuvend, duke i hequr një mandat deputeti. Sipas të dhënave paraprake, ende të paverifikuara krejtësisht, PDIU ka marrë 12347 vota në Tiranë, por nuk e ka zyrtarizuar ende mandatin e deputetit, ndërkohë që të gjitha partitë e tjera kanë marrë një mandat deputeti me një diferencë rreth 1500 vota më pak, krahasuar me PDIU-në.
Bazuar në përllogaritjet e votave në kryeqytet, LSI ka fituar në Tiranë 55566 vota prej nga ka marrë 5 mandate deputeti që do të thotë 11111 vota për një mandat.
Partia Socialiste fitoi në kryeqytet 199323 vota, prej të cilave pretendon 18 mandate. Një mandat i PS-së është barazuar me vetëm 11073.
Partia Demokratike mori në Tiranë 126908, nga të cilat fitoi 11 mandate. Çdo mandat i PD-së barazohet me 11537.
Ndërkohë që PDIU sipas numëruesëve të zgjedhjeve ka marrë në Tiranë 12347 vota, por KQZ nuk ka vendosur ende t’i japë një mandat deputeti.
Ka ndodhur edhe në qarqe të tjera padrejtësia e numrit të votave të ndara në mandate. Sipas shifrave të KQZ-së, PS ka marrë në rang vendi 757.088 nga të cilat ka prodhuar 74 mandate. Bazuar në këtë përllogaritje i bie që për çdo mandat PS ka 11500 vota.
LSI fitoi 223.453 dhe mori 19 mandate, pra rreth 12000 vota për mandat.
PD mori 451.830, nga të cilat u prodhuan 43 mandate, pra rreth 12000 vota për mandat. PDIU mori në këto zgjedhje 75 600 vota në shkallë vendi dhe i bie që i është dashur që një mandat ta fitojë me më shumë se dyfishin e votave në krahasim me partitë e tjera. Nga këto ka marrë 3 mandate me 25 333 vota për mandat. Sipas kësaj përllogaritje, janë 40 000 vota të PDIU-së që nuk përfaqësohen kund.
