Nga Arben Abazaj
Kanina është një fshat i vogël, kryesisht agrikulturor, i prapambetur si gjithë Shqipëria, me një popullsi të paktë sepse shumë prej tyre kanë emigruar në vende të ndryshme. Ajo ka qenë një nga qendrat e rëndësishme të kulturës dhe historisë së vjeter dhe të re të Vlorës dhe mbarë Shqipërisë. Megjithatë sot Kanina është lënë në gjendje të mjerueshme, pa rrugë, pa ujë dhe mbushur me plehra.
Pavarësisht se Kanina paraqet aq shumë histori, kulturë dhe resurse të shumta për turizmin, edhe për shkak të pozicionit të saj gjeografik si ballkon mbi gjirin e perëndive Vlorën, sërish këtu uji vjen një herë në dy ditë dhe ndoshta mungon edhe më shumë ditë, rruga edhe pse rilindasit kanë mbi 5 vite në pushtet nuk i kanë bërë një rrugë, madje ka gjasa që punimet të jenë ndërprerë dhe grumbuj plehrash sheh të bëjnë karshillëk duke të paraqitur saktë dhe qartë fytyrën e pushtetit në këtë fshat.
Pikërisht pra, në Kaninën e sa e sa halleve, halle të krijuara nga robi, në Kaninën që qëndron në vendin e nderit në kulturën e historinë e Shqipërisë, do duhej që para se të ndërmerrej guximi për të organizuar festa e ahengje me qëllim promovimin e historisë dhe vlerave të saj, të ishin kthyer sytë edhe nga gjendja aktuale e vetë Kaninës! Por nuk ka ndodhur kështu. Guximi i te marrëve s’para i njeh kufijtë e logjikes madje jo vetëm kur shpërdorojnë 25 milionë lekë nga buxheti i shtetit, por as kur tallen me historinë dhe vlerat e saj.
Tallja e fundit ishte organizimi i dasmës së Gjergj Kastriotit, në Kalanë e Kanines. Një organizim që veç dëshirës së mirë për të promovuar vlerat e Kaninës, nuk pati asgjë tjetër të saktë dhe të hajrit, duke filluar që nga nënçmimi dhe qëndrimi indiferent ndaj gjendjes së saj për kaq e kaq vite, por edhe te veshja e Gjergjit, duke vazhduar edhe me atmosferën e festës.
Asgjë nuk të binte parasysh kohën, kushtet, frymëzimin që ajo kohë dhe ajo dasmë binte në realitetin e atëhershëm shqiptar, atë idenë themelore mbi bazën e së cilës heroi ynë kombëtar, Gjergj Kastrioti, bëri bashkë shqiptarët. Nuk duhet që dokushdo të marrë përsipër të merret me një hero si Gjergj Kastrioti, sepse te ai është mishëruar lufta dhe sakrifica jonë për liri për shekuj me radhë, me të janë të lidhura ëndrrat tona për qëndresë, mbijetesë dhe fitore, edhe kur kohët na vinë të vështira si në ditët e sotme! Prandaj është më tepër se për të ardhur keq, sepse realisht ajo ishte një tallje që ju bë vlerave të Kaninës, Vlorës dhe Shqipërisë!
