Koço Kokëdhima kandidat për Sekretar i Përgjithshëm i PS-së?!
A mund të zgjidhet Koço Kokëdhima Sekretar i Përgjithshëm i PS?! Statuti i ri i Partisë Socialiste është hartuar në atë mënyrë sikur është bërë posaçërisht për “Super-deputetin” e Jugut të vendit. Ndryshimet e minutës së fundit në statutin e PS-së, për kriteret e kandidatëve për sekretarë të Përgjithshëm në PS, të çojnë pikërisht tek identikiti i Koço Kokëdhimës ose ndonjë tjetri të ngjashëm me të në PS.
Statuti i miratuar nga Asambleja Kombëtare e PS-së ishte një version, ndërsa ai që miratoi Kongresi ishte një tjetër. Rama e ndryshoi statutin në minutën e fundit dhe pa dijeninë e kryetarit të grupit të punës për ndryshimet statutore, Fatmir Xhafaj.
Kur Xhafaj dhe të tjerë, pjestarë të grupit të organizimit panë statutin e ri të miratuar nga Kongresi, u çuditën. Në të vërtetë, Xhafaj reagoi ashpër, por jo para mediave, sepse ky statut në tërësi ia ka mbyllur gojën përfundimisht Xhafës dhe të tjerëve në këtë parti. Nuk guxojnë për asnjë arsye të flasin kundër kryetarit.
Edi Rama e ka rregulluar në atë mënyrë statutin që t’i garantojë qëndrimin në krye të PS-së për aq kohë sa dëshiron. Është fjala për kompetencat e kryetarit të Partisë dhe parashikimin për dorëheqjen e tij, si dhe për nenin për sekretarin e përgjithshëm.
Në statutin e mëparshëm përcaktohej
“Mandati i kryetarit ndërpritet para kohe kur: a) Jep dorëheqjen; b) partia humbet në zgjedhjet e përgjithshme dhe c) humbet në mocionin e mosbesimit të zhvilluar për të, me kërkesën e 1/3 së anëtarëve të partisë”, thuhej në projekt-statutin e miratuar nga Asambleja Kombëtare.
Por, Kongresi i 19 marsit ka miratuar një tjetër version të kësaj pike të statutit.
“Mandati i kryetarit është katër vjet. Mandati i tij ndërpritet para kohe kur: a. Jep dorëheqjen; b. Partia humbet vendin e parë në zgjedhjet e përgjithshme; c. Humbet në mocionin e mosbesimit të zhvilluar për të me kërkesën e 1/3 së anëtarëve të Partisë Socialiste”.
Ky është neni që i garanton Ramës qëndrimin në mandate për aq kohë sa ai dëshiron.
Është fakt që në të gjitha zgjedhjet, prej vitit 1997 e këtej, Partia Socialiste, është renditur si partia më e votuar. Për shkak të kodit elektoral, jo gjithmonë numri i votave të marra nga një parti përkthehet në deputetë ose më mirë pushtet.
Edhe në vitin 2005, kur PS-ja i humbi zgjedhjet, në fund të procesit ajo ishte partia me numrin më të madh të votave, përkatësisht me rreth 20 mijë vota më shumë se sa PD-ja. Por, Fatos Nano dha dorëheqje, pasi PS i humbi zgjedhjet.
Referuar rezultateve të KQZ-së, në vitin 2005 PS-ja mori 121,412, ndërsa PD-ja mori 104.796 por PS-ja i humbi zgjedhjet sepse PD mori më shumë mandate për shkak të sistemit zgjedhor.
Në vitin 2009, PS-ja mori 620,586 vota ndërsa PD-ja mori 610463 vota, por PS i humbi sërish zgjedhjet për shkak të sistemit zgjedhor.
Në vitin 2013 PS-ja mori 713,407 vota, ndërsa PD-ja mori 528 373 vota.
PS-ja i fitoi zgjedhjet, edhe pse pati të njëjtin numër mandatesh deputetësh me ato të vitit 2009.
Partia e Ramës fitoi në koalcion me LSI-në. Ajo që vihet re nga zgjedhjet e gjithë këtyre viteve, elektorati i PS-së është stabël dhe nuk ka rënie në proporcional.
Të njëjtat rezultate janë edhe në zgjedhjet vendore.
Pra, PS-ja ka vazhduar të ketë numrin më të madh të votave në elektorat. Kjo i garanton Ramës përjetësi në krye të selisë rozë, sepse edhe prirjet elektorale në Shqipëri duket se ka pak gjasa të ndryshojnë.
Kjo pikë e statutit e varros përfundimisht demokracinë në PS. I jep Edi Ramës pushtetin absolut në krye të partisë dhe lirinë për të përjashtuar këdo që i del përpara. Të gjithë njerëzit në PS, duke nisur nga Gramoz Ruçi e deri në fund të listës janë thjesht “skllevër” të kryetarit, pa asnjë pushtet në duart e tyre. Forumet janë inekzistente përpallë peshës që merr kryetari sipas statutit të ri të Partisë Socialiste.
Sekretari i Përgjithshëm
Drafti i parë, i cili mori miratimin e Asamblesë Kombëtare, sanksiononte rikthimin e postit të Sekretarit të Përgjithshëm, të cilin PS e hoqi si strukturë në Kongresin e 5 viteve më parë, nëntor 201. Sipas statutit të pandryshuar, Sekretari i Përgjithshëm merr kompetenca të forta referuar edhe faktit se kur partia është në pushtet kryetari i partisë është dhe Kryeministër, dhe nuk i mbetet shumë kohë që të angazhohet me punët e partisë. Shumë prej kompetencave i kalonin Sekretarit të Përgjithshëm.
Referuar kompetencave të rritura për sekretarin e përgjithshëm, në draftin e parë të miratuar nga grupi Xhafa, ai zgjidhej nga Kongresi, dhe po sipas këtij statuti, sekretari i përgjithshëm drejtonte dhe sekretariatin ekzekutiv të partisë që zgjidhet nga Asambleja. Sekretari i Përgjithshëm do të kishte fuqinë drejtuese të kryetarit në të gjitha rastet që ai do të mungonte.
Por, duket se një figurë kaq e fortë në parti nuk u pëlqye dhe një pjesë e koordinatorëve të PS-së u përpoqën që t’ia ulnin kompetencat dhe pushtetin Sekretarit të Përgjithshëm në PS.
Ditën e kongresit më 19 mars, u vendos papritur që Sekretari i Përgjithshëm të zgjidhej nga Asambleja Kombëtare, njëlloj si sekretarët e tjerë. Bashkë me këtë pikë të statutit ndryshoi edhe ajo e kritereve për kandidatin për sekretar të përgjithshëm.
Drafti i Asamblesë
“Kandidatët për Sekretar të Përgjithshëm të partisë duhet të kenë të paktën një mandat si anëtar të Asamblesë Kombëtare ose të jenë mbi 10 vjet anëtarë të partisë. Prezantimi i kandidaturës së Sekretarit të Përgjithshëm duhet të ketë mbështetjen e 5 % të delegatëve të Kongresit. Asnjë prej kandidatëve nuk duhet të ketë mbështetjen e më shumë se 10 % të delegatëve”, thuhej në draftin e parë që iu paraqit Asamblesë Kombëtare.
Ndërsa në draftin e dytë, hiqet kriteri i vjetërsisë në parti, pra kandidati për Sekretar të Përgjithshëm nuk është domosdoshmëri të ketë qënë dhjetë vjet anëtar i PS-së apo të ketë qënë një mandat anëtar i Asamblesë Kombëtare.
Ky kriter i afrohet më së shumti Koço Kokëdhimës sepse nëse do vazhdon të jetë në me
ndjen e Ramës kandidatura e Ruçit, nuk ishin të nevojshme ndryshimet në statut në këtë pikë. Edhe në rast se do të jetë Taulant Balla, i zgjedhuri i Ramës, sërish nuk i duheshin këto ndryshime, pasi Balla i ka dhjetë vite në PS dhe më shumë se sa një mandat në Asamblenë Kombëtare. Nuk është çudi që sekretar i Përgjithshëm i PS-së të zgjidhet Koço Kokëdhima.
