Nga: Luljeta Progni
Referendumi i 9 prillit do të mbetet si një ndër ngjarjet më të turpshme të historisë së partive politike në Shqipëri. E ngjashme për nga imazhi me zgjedhjet e manipuluara të 26 majit 1996. Referendumi i manipulua dhe tashmë ky është fakt. Janë publikuar prova të pakundërshtueshme nga emisioni “Stop” në TV Klan. Provat flasin për mbushje të kutive të votimit, ndërsa një person voton më shumë se një herë. Kjo ka ndodhur dhe më 26 maj 1996, kur socialistët u tërhoqën nga procesi i votimit dhe demokratët mbushën kutitë e votimit siç ua deshi qejfi. Njësoj si referendum i PS-së edhe zgjedhjet e 26 majit patën një rezultat plebishitar në favor të më të fortit.
Do të mbetet turpi i Edi Ramës dhe i PS-së ky referendum edhe për mënyrën se si u vendos të zhvillohej.
Në krye duhet thënë, Rama iu tremb garës në PS dhe këtë e ka faktuar referendumi dhe të gjitha provat që dëshmojnë për manipulimin e këtij procesi. Rama pati frikë të përballet me Blushin jo se mund të humbiste garën, por se do të kishte një numër votuesish, të cilët nuk e legjitimonin dot qëndrimin e tij në krye të Partisë Socialiste. Argumenti i parë i Ramës kundër garës në Partinë Socialiste ishte që ishte rikonfirmuar në krye të PS-së për shkak të fitores në dy palë zgjedhje. Ndërkohë që argumenti plotësohej me justifikimin që partia nuk ka pse të harxhojë kohë e energji, por dhe financa për të organizuar një proces zgjedhor të panevojshëm dhe që rezultati i tij dihej. Në fakt, këto argumente të kryeministrit kanë rënë, sepse partia hyri në votim, u harxhua kohë, nerva, energji e financa për të kryer një proces që do të jetë një vulë tjetër turpi në historinë e kësaj partie.
Do të mbetet i tillë, sepse provat e pakundërshtueshme konfirmojnë dy fakte. E para se të gjithë ishin urdhëruar të votonin një “Po” për një pyetje, kuptimi i së cilës nuk dihej pasi kështu thanë ata socialistë që votuan. “Na thanë votoni PO”. E dyta se një socialist ka votuar më shumë se një herë që do të thotë se rezultati i pjesëmarrjes së socialistëve në referendum është manipuluar. E treta se votuan njerëz që nuk ishin anëtarë të PS-së.
Ben Blushi e ka denoncuar një gjë të tillë qysh herët, ndaj dhe Rama nuk guxoi të përballet në një garë për postin e kryetarit. Ai do të përballej me një përqindje të vogël të votave socialiste në favor të tij, megjithëse garën me Blushin do ta ftonte në çdo rast.
Problemi nuk është se çfarë bëjnë socialistët me punët e tyre të brendshme. Problem është se referendumi i PS-së rikonfirmoi standartet e zgjedhjeve në Shqipëri, manipulimin. Cila është garancia që na jep kryeministri se do të zhvillohen zgjedhje të lira dhe demokratike ashtu siç pati premtuar kur ishte në opozitë? Tashmë nuk ka më asnjë garanci. Me Ramën, Shqipëria i ka humbur të gjithë shanset për të zhvilluar zgjedhje demokratike.
Pas ngjashmërisë së referendumit të PS-së me zgjedhjet e 26 majit, ai që mbetet për t’u parë është reagimi i socialistëve. A do të kemi ngjashmëri me reagimin e shqiptarëve pas zgjedhjeve të 26 majit, ku revolta popullore që pasoi, rrëzoi Berishën? Në PS ka shumë pak gjasa të ndodhë kjo. Arsyeja: të gjithë senatorët e PS-së janë nënështruar para autoritarizimit të kryetarit të partisë së tyre.
