Kryeministri Edi Rama duke folur për situatën politike në vend, ka deklaruar se zgjedhjet do të jenë më 30 qershor pavarësisht kërcënimeve e shantazheve.
Nga foltorja e kuvendit, Rama tha se opozita në vend se t’i përfaqësojë zgjedhësit e vetë në këtë sallë dhe në zgjedhje ka vendosur t’i nxjerrë dhe ata nga rruga e betejës demokratike.
“Aty ku opozitat kanë zgjedhur të braktisin zgjedhjet, praktikisht kanë marrë mbrapsht një periudhë të gjatë rrënimi dhe vështirësish të jashtëzakonshme për rindërtim. Në vend se të luftojë me program dhe ide ka zgjedhur të luftojë me kërcënime dhe kapsolla. Në vend se t’i përfaqësojë zgjedhësit e vetë në këtë sallë dhe në zgjedhje ka vendosur t’i nxjerrë dhe ata nga rruga e betejës demokratike e në vend se t’i udhëheqë në rrugën e betejës demokratike ka vendosur t’i përdorë si mish për top duke u fshehur pas tyre. Është shumë e rëndë dhe e padëgjuar, e papranueshme nga askush, as nga vetë shumica dërrmuese e zgjedhësve të Bashës apo Kryemadhit. Por ndërkohë edhe ne nuk kemi ndonjë zgjedhje tjetër përveç se të vijojmë rrugën tonë pa u ndalur të merremi me ta, domethënë pa devijuar nga rruga e zgjedhjeve të 30 qershorit pavarësisht kërcënimeve, shantazheve apo rreziqeve të një procesi kur dy parti politike përbetohen se do ta dhunojnë të drejtën e popullit për të zgjedhur kryetarët e bashkive dhe këshillat e bashkive në Republikën e Shqipërisë”, deklaroi Rama.
