Kryeministri Edi Rama ka vijuar sulmin ndaj presidentit Meta edhe gjatë takimit të tij elektoral në bashkinë e minoritetit maqedonas, Pustec.
Ironia e Ramës shkoi deri aty sa tha se Meta duhet të kishte ndaluar kafen turke në shtëpi deri në 30 qershor dhe ndërkohë ti kishte kërkuar dhe doktor Berishës të mbyllte Bashën në shtëpi.
“Shqipëria është në një moment historik ashtu si Maqedonia e Veriut, presin të dyja vendet çeljen e negociatave por për fat të keq ndryshe nga Maqedonia e Veriut Shqipëria është në një përpjekje të brendshme për ti shpëtuar një kurthi të ngritur nga brenda nga njerëz që synojnë pengimin dhe refuzimin e negociatave për anëtarsim në BE. Kjo është fatkeqësi.
Dje bëra një prononcim për një tjetër mik të mirë që është Presidenti i Maqedonisë së Veriut lidhur me një deklartatë të bërë prej tij ku lexova në një mënyrë të nënkuptuar që problemet në Shqipëri nuk duhet të jenë pengesë për Maqedoninë e Veriut dhe se nënkuptimi shkonte se mund të ndahen në trajtimin e tyre. Presidenti më shkruajti dhe u sqaruam në lidhje me këtë deklaratë por e vërteta është që ka një dallim të rëndë, për të ardhur keq për ne. Presidenti i Maqedonisë së Veriut është pjesë e përpjekjes së popullit, shtetit, qeverisë së tij për të bindur vendet anëtare, Këshillin Europian se duhen çelur negociatat.
Presidenti i Shqipërisë është pjesë e përpjekjes për të kundërtën. Është pjesë e përpjekjes për të krijuar deri në fund një dyshim që të kthehet në bindje te disa nga vendet, apo ata që duhet ti bindim së bashku se Shqipëria nuk meriton çeljen e negociatave. Me sjelljen e tij, qasjen e tij, brutalitetin dhe papërgjegjshmërinë me të cilën ai trajton Kushtetutën dhe ndërhyrjen skandaloze në procesin zgjedhor në funksion të plotë të një plani ku ai është koka së bashku me Sali Berishën dhe ku Lulzimi dhe fallxhorja janë thjeshte dhe vetëm marionetat e tyre, Presidenti na bën të gjithëve të na vijë zor dhe pse jo të ndihemi të turpëruar. Shqipëria nuk ja ka borxh Ilir Metës, i cili sot duhet të ishte avokat kryesor për meritën e Shqipërisë për të çelur negociatat.
Nuk duhet të merrej me filxhanin e fallxhores, por pëprjekjet për të takuar homologë, për të udhëtuar në kryeqytetet europiane, për të folur për rëndësinë e çeljes së negociatave. Dhe nga ana tjetër duhet të merrej me qetësimin e fallxhores dhe të ndalonte kafen turke në shtëpi deri në 30 qershor. Me qetësimin e doktorit, për të cilin nuk lë rast pa thënë se është shumë krenar që e ka mik të vjetër. Ti thoshte doktorit mbylle Lulin në shtëpi deri në 30 qershor. Ju e dini shumë mirë që doktori e mbyll Lulin brenda. Çfarë i kushtonte Ilir Metës të ndalonte kafen turke deri në 30 qershor? Nuk do të kishte situata sa qesharake dhe të rrezikshme”, tha Rama.
