“Ogerta Manastirliu, Edi Rama dhe Shpend Ahmeti, bëni detyrën dhe mos tregoni me gisht qytetarët!”.
Këtë ka thënë sot në “ABC-në e Mëngjeësit” gazetari Enkel Demi.
“Dje, ministrja e Shëndetësisë, ka demonstruar disa foto të qytetarëve të Tiranës që shëtisnin të çlirët në një zonë të liqenit artificial. Ato foto ajo i përdori si një lloj mësimi moral të ashpër për të treguar që “shiko sa të pakujdeshëm jeni, prandaj pandemia po bën këtë gjë…”.
Në radhë të pare, ky është mentalitet komunist dhe diktatorial që t’i bësh qytetarët me faj, se je i pazoti t’i mbrosh. Kjo do të thotë që nesër-pasnesër shefi i Ogerta Manastirliut, i cili është Edi Rama, do të dalë në televizor dhe do të thotë se është rritur numri i të vdekurve dhe mbi të gjitha është rritur numri i të infektuarve dhe nuk kam kapacitete, sepse ju dilni tek kodrat e liqenit pa maska. Duhet të themi një gjë, njerëzit dalin te kodrat e liqenit, sepse nuk kanë vend tjetër ku të dalin. E tillë është Tirana, një fjetore gjigande, e cila nuk ka më lulishte dhe nuk ka më vende periferike ku të dalin…”.
Kel Demi nuk ka kursyer as kryetarin e Prishtinës, i cili u rrëfye entuziast nga ky lloj bullizmi qeveritar mbi qytetarët e Tiranës.
“E fundit, kryetari i Prishtinës, Shpend Ahmeti dje ka postuar pamjet e Tiranës, dhe përqeshte qytetarët e Tiranës, dhe njoftonte prishtinalitë që çfarë rreziku i pret në Tiranë. Ky njeri nëse do të bëjë detyrën e tij si kryetar i Prishtinës, duhet të bëjë presion mbi qeverinë që Prishtina, Prizreni dhe Dardania të ngrohen jo me qymyr guri dhe në Prishtinë të dalë dielli para orën 09.00 të mëngjesit…”.
