E bija e Bashkim Koplikut thotë se babai i saj, ish-zëvendëskryeministri i vendit në qeverisjen e parë të PD-së, Bashkim Kopliku nuk vdiq nga COVID-19.
Sipas Gazetës Mapo që ndoqi ceremoninë mortore në Durrës, e bija tha që gjendja e babait të saj ishte e qëndrueshme, por për shkak se COVID-19 i kishte prekur mushkëritë, kishte nevojë për oksigjen.
Vajza e Koplikut gjithashtu tha se politikani ndërroi jetë, në momentin kur po mobilizoheshin familjarisht për ta dërguar me avion jashtë vendit për mjekim të specializuar, pasi mjeti i fluturimit u vonua për të mbërritur në Rinas nga Turqia dhe për t’u nisur drejt Italisë.
“E pabesueshme për të gjithë. Për ju ishte Bashkim Kopliku, për mua ishte im atë. Sa i drejtë që ishte, sa shumë bënte për të gjithë njerëzit. Nuk vdiq nga COVID-19, por nga pakujdesia e shtetit. Ndërroi jetë pasi nuk kishte oksigjen. Vdiq kur po e dërgonim në avion në Itali për kurim më të specializuar”,- tha ajo.
Vajza e Koplikut gjithashtu shtoi se edhe ambulanca erdhi me vonesë në spitalin e Durrësit, ku ishte shtruar prej ditësh.
Ditën kur u komunikua vdekja e zëvendëskryeministrit, ndër të parët që reaguan ishte kryeministri Edi Rama.
Ai e cilësoi si një mik të mirë, ndonëse nuk e kishte takuar kurrë nga pranë, veçse me mesazhe të shkëmbyera telefonike.
Koronavirusi/ Vdiq në avion… Si u nda nga jeta ish-zëvendëskryeministri i parë qeverinë pluraliste
