Mesila Doda: Nuk duhet të presim nga sllavët, të shpallim mëvetësinë e Iliridës. Rakipi: Rruga e Arbërit katastrofë. PDIU është parti e njerëzve të thjeshtë dhe jo e interesave politike.
Gjatë një takimi të zhvilluar në Dibër, kryetari i PDIU-së, Shpëtim Idrizi u shpreh se do të mbështesë çdo qeveri që do ta bëjë realitet Rrugën e Arbërit. Idrizi tha se PDIU do të ushtroj presion ndaj qeverisë dhe do të ngrihet në Kuvend për ta bërë realitet këtë rrugë.
“Ne e dimë shumë mirë që padrejtësitë ekonomike i kanë rrudhur shqiptarët. Ne do të bëjmë gjithçka, do të lobojmë, do të bëjmë presion, do të ngrihemi në Parlamentin e Shqipërisë dhe do mbështesim çdo qeveri e cila do ta bëjë realitet Rrugën e “Arbërit”. Jo thjesht dhe vetëm si retorikë politike dhe jo thjesht si detyrim ndaj mbështetjes tuaj, por po e përsëris, nuk mund të ndodhë që pas 25 vitesh demokraci, çereku i Shqipërisë të jetë jashtë dhe e pa integruar me pjesën tjetër të vendit. Këtë turp mund ta bëjë vetëm politika shqiptare. Prandaj, i duam bijtë dhe bijat tuaja, që Rrugën e “Arbërit” ta kthejmë në një realitet të prekshëm për të gjithë ju.”
Përsa i përket shpotisë malinje të forcës së PDIU-së në Dibër dhe të ironisë për çamët e Dibrës ai tha:
“Partinë Drejtësi, Integrim dhe Unitet ju e keni parë që etiketohet vazhdimisht, edhe këtu në Dibër. E dini pse? Jo thjesht dhe vetëm puthadorët e Athinës apo të Beogradit, por e dinë shumë mirë që duan të godasin shqiptarinë. E kemi theksuar gjithmonë jemi parti e interesit kombëtar dhe interesit të qytetarëve.”
Idrizi u shpreh se PDIU ka mbështetur reformat e mëdha por nuk ka qënë asnjëherë pjesë e pushtetit. Sipas Idrizit marrëveshja me mazhorancën është zbatuar në vetëm 1 % të saj dhe sipas tij, PDIU do të mbajë përgjegjësi për vetëm 1 %.
“Çfarë dua të them me këtë? Në të gjithë Shqipërinë marrëveshja jonë me shumicën është zbatuar vetëm 1 % dhe ne mbajmë përgjegjësi për këtë mazhorancë dhe qeverisjen e saj vetëm 1 %, por mbajmë përgjegjësi 100% për mbështetjen tuaj dhe për t’i kthyer deputetët tuaj në interes të Dibrës.”
Ndërsa sekretarja e përgjithshme e PDIU-së, Mesila Doda tha se klasa politike shqiptare po kalon një krizë të thellë. Sipas saj gjendjen e frikës, të dhunës, arrogancës dhe pabesisë, politika po mundohet ta transferojë tek njerëzit. Doda nga Dibra fqinje çoi një mesazh në Shkup:
“Më së fundi dy fjalë për një krahinë të moçme shqiptare që edhe emrin sot ja kemi harruar dhe dikush i thotë Maqedoni e dikush FYROM. Ne e ripërsërisim Ilirida! Nuk do ketë Ivanov, Gruevsk apo ndonjë antishqiptar tjetër që ta ndryjnë jetën e shqiptarëve tanë në ato treva dhe ta kthejnë në Palestinën e Europës. Shqiptarët e Iliridës duhet të kërkojnë të drejta të plota. Nëse Zaev tërhiqet a nëse presidenti që firmosi fundin e shtetit të vet nuk jep dorëheqjen, urgjentisht të mblidhet tryeza e forcave politike mbarëshqiptare e të ndihmojnë që Ilirida të mbajë referndumin për mëvetësinë.”
Deputeti i PDIU-së, Aqif Rakipi u shpreh se PDIU është parti e njerëzve të thjeshtë dhe jo e interesave politike. Kjo është arsyeja që mbështetja e PDIU-së në Dibër është kaq e madhe. Ai më tej shtoi:
“Gjendja e Rrugës së Arbërit është katastrofë, por nuk u lodhëm teksa vinim, sepse këtë na prisnin njerëz shumë mikpritës. Megjithatë këtu nuk jemi vetëm për t’ju marrë votën, por edhe për të zgjidhur hallet e njerëzve.”
