Grupi parlamentar i PD-së, pritet të mblidhet në orën 12:00, ku deputetët do të njihen me përgjigjen zyrtare lidhur me propozimin amerikan për reformën në drejtësi.
Partia Demokratike i ka thënë Jo edhe propozimit të fundit të Shteteve të Bashkuara të Amerikës, për reformën në drjëtsi, i bërë së fundmi nga zyrtarja e lartë amerikane Viktoria Nuland.
“Top Channel” ka siguruar propozimin më të ri dorëzuar nga Partia Demokratike lidhur me reformën në drejtësi si kundërpërgjigje ndaj propozimit më të ri amerikan bërë të dielën gjatë vizitës së Nënsekretares së Shtetit, Viktoria Nuland. Por, sipas burimeve të rëndësishme dhe siç shihet qartë nga drafti, të cilin ne në faqen e Top Channel po e botojmë të plotë, propozimi i PD-së kërkon e ndërkombëtarëve nga vetingu. Komisioni zgjidhet politikisht dhe është ai që përjashton kandidatët. Amerikanët propozuan që të marrin ata dhe jo europianët në dorë drejtimin e Komisionit Ndërkombëtar të Vetingut. Propozimi i PD-së është bërë dje. Por ai bie në kundërshtim me atë që kërkojnë ndërkombëtarët dhe draftin aktual në tryezën e komisionit të reformës.
Partia Demokratike ktheu një përgjigje për propozimin amerikan të kompromisit dhe përgjigja e opozitës nuk i jep Shteteve të Bashkuara të Amerikës dhe Bashkimit Europian fuqi vendimmarrëse në procesin e vetingut.
Në propozimin e saj të ri, opozita u jep ndërkombëtareve rol vëzhgues, por jo atë “të duhurin”, siç u shpreh të dielën Ndihmës/sekretarja e Shtetit, Viktoria Nuland. Në propozimin amerikan, ndërkombëtarët kishin fuqi vendimmarrëse për procesin e verifikimit të pastërtisë së figurës së prokurorëve dhe gjyqtarëve, ndërsa opozita i përjashton ata nga ky rol.
Burime diplomatike bënë të ditur për Top Channel se ata prisnin një qëndrim të ndryshëm nga opozita pas takimit me zonjën Nuland.
Hapat e parashikuar nga propozimi i PD për vettingun:
- Avokati bën shpalljen për aplikim.
- Avokati çon listën e plotë në Kuvend, pa përjashtuar asnjë kandidat.
- Lista i dërgohet Kuvendit bashkë me dokumentacionin zyrtar. Procesi zhvillohet me monitorim nga Operacioni Ndërkombëtar i Monitorimit.
- Kuvendi krijon 2 komisione ad hoc. Njëri me 12 anëtarë, tjetri me 6 anëtarë. Në çdo rast me përbërje të barabartë.
- Komisioni me 6 anëtarë shqyrton kandidatët dhe verifikon përmbushjen e kritereve. Ky komision merr vendim për përjashtimin e një kandidati (akt administrativ) bazuar vetëm në prova.
- Pas seleksionimit dalin 3 lista. (a) lista me kandidatët për komisionerë, b) lista me kandidatët për komisionerë publikë c) lista me kandidatët për gjyqtarë);
Në propozimin e PD-së thuhet se “Vëzhgues nga Operacioni Ndërkombëtar i Monitorimit kanë të drejtë të marrin pjesë në seancat e shqyrtimit të kandidatëve pa asnjë kufizim. Kjo trupë ka të drejtë të ketë akses të plotë dhe të papenguar tek çdo dokumentacion që administron komisioni.” propozimi i PD-së thotë se “Pas përfundimit të shqyrtimit të kandidatëve nga komisioni ad hoc, ONM ka të drejtë t’i dorëzojë Kuvendit një raport të detajuar me vlerësim për secilën kandidaturë, sipas kritereve kushtetuese dhe ligjore dhe dokumenteve dhe provave të administruara nga komisioni”
- Kandidatët e përjashtuar kanë të drejtë të ankohen në Gjykatën Kushtetuese.
- Komisioni ad hoc me 12 anëtarë zgjedh 12 komisionerët e Komisionit të Kualifikimit. Propozimi parashikon që “zgjedhja bëhet pa debat përmes një votimi të fshehtë elektronik, ku secili anëtar i komisionit voton për 1 kandidat. Procesi mundëson që zgjedhjet të jenë sekrete duke shmangur kështu etiketimin politik të kandidatëve”.
- I njëjti komision ad hoc nga parlamenti me 12 anëtarë zgjedh edhe 2 Komisionerët Publikë (përsëri pa debat dhe përmes një votimi të fshehtë elektronik). 2 kandidatët që marrin më shumë vota do të quhen fitues. Nqs 2 ose më shumë kandidatë marrin një numër të barabartë votash, fituesi zgjidhet me short midis tyre.
Propozimi i PD-së përfshin një mënyrë të ngjashme edhe zgjedhjen e gjyqtarëve që do të vendosin për ankimimet e kandidatëve të përjashtuar nga procesi i vettingut.
- Kuvendi mund të pranojë ose rrëzojë listën e kandidatëve në bllok me një shumicë të cilësuar (2/3). PD thotë se kështu “Kuvendi nuk e ka të mundur të pranojë ose rrëzojë vetëm një pjesë të listës”.
PS: JEMI TE HAPUR
Komisioni i Posaçëm parlamentar për Reformën në Drejtësi përfundoi dje shqyrtimin nen për nen të projektligjit “Për funksionimin e Prokurorisë në Republikën e Shqipërisë”.
Pas mbledhjes, anëtari socialist i Komisionit, Ulsi Manja bëri të ditur se mazhoranca mbetet e hapur për çdo propozim që vjen nga opozita. “Përfaqësuesit e opozitës kanë të drejtën të japin kontributin e tyre, me sugjerime dhe komente, por nuk besoj se do një jetë një diskutim nga e para pasi kjo paketë, sidomos ligjet, janë diskutuar me frymën e konsensusit edhe me opozitën”, – tha ai.
Ndërkohë, anëtarët demokratë të Komisionit, kanë nisur nga puna për shqyrtimin e 7 ligjeve shoqëruese të ndryshimeve të paketës kushtetuese. Burime pranë PD-së bënë me dije për “GSH” se pas porosisë së kryetarit, Lulzim Basha, demokratët po verifikojnë ndryshimet ligjore të cilat kanë kaluar në Komision pa praninë e opozitës.
