Kryetari i Kuvendit Ilir Meta u prit nga Presidenti i Republikës Filip Vujanovic, në kuadër të vizitës zyrtare në Mal të Zi.
Vujanovic shprehu mirënjohjen e thellë për mbështetjen e vazhdueshme të Shqipërisë dhe në veçanti për ratifikimin e protokollit të aderimit të Malit të Zi në Traktatin e Atlantikut Verior nga Kuvendi i Shqipërisë me 23 qershor.
Kryetari i Kuvendit Meta dhe Presidenti Vujanovic vunë në dukje se marrëdhëniet mes Shqipërisë dhe Malit të Zi janë të shkëlqyera dhe shërbejnë si një model për të gjithë rajonin.
Në këtë kuadër, bashkëpunimi mes dy parlamenteve është shumë i rëndësishëm dhe duhet përqendruar në avancimin e proceseve integruese euro-atlantike si dhe në mbështetje të të dy qeverive reciproke për zgjerimin e shkëmbimeve ekonomike e tregtare.
Meta theksoi se marrëdhëniet vëllazërore që ekzistojnë sot mes dy vendeve tona reflektojnë transformimet e mëdha që kanë ndodhur gjatë viteve të fundit, dhe në këtë drejtim shqiptarët gëzohen me progresin e Malit te Zi dhe me ndryshimet rrënjësore në marrëdhëniet tona.
Në këtë drejtim, u shpreh z. Meta, njëkohësisht me projektet infrastrukturore dhe energjetike rajonale si Korridori Blu apo zgjatimi i Gazsjellësit TAP drejt Malit të Zi, Kroacisë e Bosnjës që kanë rëndësi strategjike për të gjithë kontinentin, dy vendet tona duhet të avancojnë me përmirësimin e infrastrukturës ndërkufitare dhe parqeve natyrore, si dhe të punojnë për krijimin e një tregu të përbashkët për të ardhmen.
Gjatë takimit me Presidentin e Malit të Zi, Filip Vujanovic, Kryetari i Kuvendit Ilir Meta preku edhe çështjen e pakicës nacionale shqiptare të Malit të Zi.
Duke vlerësuar vëmendjen e merituar deri më sot prej autoriteteve malazeze ndaj pakicës autoktone shqiptare, z. Meta nënvizoi se duhen gjetur zgjidhje konkrete edhe për ato çështje të mbetura që shqetësojnë këtë pakicë, zgjidhje që duhet t’i shërbejnë jo vetëm ndjeshmërive dhe nevojave ekonomike e sociale të komunave lokale, por njëkohësisht edhe forcimit të mëtejshëm demokratik e euro-atlantik të Malit të Zi.
