Partizani pret trenin e fundit

Rreth 600 forca policie do të jenë të angazhuara për ndeshjen e Korçës, ku pritet një 90 minutësh i nxehtë

Pavarësisht humbjes shokuese në “Qemal Stafa” ndaj Bylisit, ëndërra e Partizanit për të fituar titullin kampion vazhdon të ketë mundësi të qarta matematike. Drejtuesit e skuadrës së kuqe gjithmonë janë shprehur se do të ishte mirë që ky edicion të diskutohej në 90 minutëshin e Korçës dhe ja ku e kanë të gjithin në dispozicion, për ta rihapur çështjen e titullit. Por vetëm se fitorja e kryeqytetasve është taksative, për të pasur mundësi të presin për të parë se çfarë do të ndodhë në javën e fundit. Ndërsa Skënderbeut do t’i mjaftonte edhe një barazim për të udhëtuar më pas për në Vlorë, ku do të luajnë një ndeshje pa asnjë interes dhe ku mund të bëjnë edhe plazh pa e vrarë mendjen. Ndërkohë, veç faktorit fushë edhe formacioni i Partizanit nuk do të jetë i plotë. Felipe Gomes do t’i mungojë gjatë fushave të lojës, për shkak të një dëmtimi dhe aktualisht ndodhet në Itali për t’u ekzaminuar. Steven Raçiç dhe Ditmar Bici i kanë ndërprerë marrëdhëniet me klubin në momentin më të rëndësishëm të edicionit, por trajneri Agostineli është optimist për alternativat që ka në dispozicion. Fillimisht u tha se tifozët nuk do të udhëtonin në masë, si një shenjë proteste për humbjen e fundit në shtëpi, por duket se kanë kthyer mendje dhe për shkak të këtij masiviteti është menduar për angazhimin e rreth 600 forcave policore për të garantuar mbarëvajtjen e ndeshjes.