U deshën 100 ditë që Partizani i Agostinelit të kthehej tek fitorja jashtë fushës, duke bërë një hap të sigurtë në prag të takimit të së hënës ndaj Skënderbeut në “Qemal Stafa”. Ishte një ndeshje pothuajse perfekte e skuadrës së kuqe, që ka fituar personalitet dhe vazhdon të synojë kreun e renditjes. Një 0-2 në Ballsh nuk është rezultat që mund të arrihet lehtësisht, jo vetëm për hir të shkallës së vështirësisë së “Adush Muçës”, por edhe për cilësinë e Bylisit të tanishëm. Trajneri i vendasve Zildoviç tregohet kontradiktor në prononcimin e tij pas takimit, kur thotë se skuadra që drejton ishte më e mira në fushë, por nga ana tjetër vendosën kualitetet e Partizanit, kryesisht Raçiç dhe Fejzullahi. Tjetër hap fals i Tiranës me këtë 0-0 në shtëpi dhe tashmë ka humbur edhe vendin e katërt. Bardheblutë janë zyrtarisht në krizë. Në fushë e kanë të vështirë të zhbllokohen, tifozët u janë transferuar jashtë stadiumit, ndërsa mendimi i përgjithshëm është se klubi po menaxhohet keq. Misioni “Europë” po bëhet gjithnjë e më i vështirë. Flamurtari mori atë për të cilën kishte ardhur, duke u mbrojtur mirë, por edhe vlonjatët vazhdojnë ta kenë të vështirë të gjejnë golin. Tani trajneri Ramadani duhet të mendojë për ndeshjen e fundjavës ndaj Bylisit dhe të urojë rikuperimin e Danilos, i cili pas një dëmtimi në kavile u transportua për në spital, për një mjekim më të specializuar. Kukësi fiton 1-0 ndaj Laçit me një gol të të përhershmit Emini dhe po ecën i sigurtë me ritmin e Klodian Duros. Ndërsa Vllaznia arrin një fitore 0-4 në transfertën e Pukës, një ambjent që në fillim të edicionit e kishte shtëpinë e saj dhe ku kuqeblutë janë dashuria e hershme e vendasve.
