Nga Ergys Mërtiri
Panairi i librit po vjen më i varfër se kurrë. Gjatë këtij viti ka më pak tituj të rinj, më pak shtëpi botuese pjesëmarrëse dhe asnjë sponsor, përveç Ministrisë së Kulturës. Për librin nuk interesohet më kush.
Por nuk është kjo më e keqja. Drama e vërtetë qendron tek zhdukja e lexuesve. Shoqata e botuesve thotë se tirazhet kanë rënë në nivele drastike dhe se kanë arritur të nxjerrin libra deri në 200 kopje. Nuk dimë sa prej këtyre kopjeve, arrijnë të shiten, por kjo do të thotë se ky panair të ngjan më shumë si një funeral i librit.
Dhe kjo nuk është thjesht një rënie momentale. Botuesit thonë se rënia ka ardhur duke u rritur nga viti në vit dhe duket se, më keq do të bëhet. Lexuesi ka humbur interesin e nuk afrohet tek libri. Dhe ky është një ogur i keq.
Në fakt, alarmi për rënien e lexuesve është ndezur prej kohësh kudo në botë. Zhvillimi i teknologjisë së komunikimit, e sidomos argëtimit ka qenë një zhvillim vrastar për shoqërinë moderne duke iu vjedhur njerëzve kohën e leximit, mësimit apo të menduarit. Televizioni, kinemaja, por edhe interneti po shkatërrojnë aftësitë e njeriut për të mësuar e menduar.
Megjithatë, në vendet e zhvilluara, njerëzit mundohen të mbahen sado pak. Kushdo që ka udhëtuar nëpër Europë e di që nëpër trena, tramvaje apo metro, duke shkuar në punë apo kudo, njerëzit mbajnë me vete përgjithësisht ndonjë libër, për të përfituar në kohë. Kjo nuk ndodh në Shqipëri. Infeksionet e botës moderne ne i marrim gjithmonë në doza helmuese.
Me këto ritme do të kthehemi, dhe kemi filluar tashmë, në një shoqëri injorantësh, ku padituria do të sundojë në mënyrë të frikshme. Po rrisim një brez që i ka sytë vetëm tek qejfi, argëtimi, parazitizmi, paratë, seksi dhe makinat e bukura. Nëse nuk kultivojmë asnjë vlerë, e ardhmja nuk mund të jetë aspak premtuese.
/Civitas.al/
