“Mund të garojnë vetëm PS dhe LSI më 18 qershor por nuk do të kemi institucione me legjitimet pas zgjedhjeve”
Presidenti i Republikës Bujar Nishani tha se bojkoti i opozitës është një shqetësim i madh për vendin.
“Situata është kritike pasi sot opozita në Shqipëri ka zyrtarizuar mos pjesëmarrjen e zgjedhjeve të 18 qershorit. Janë tejkaluar afatet e regjistrimit dhe kjo krijon komplikacion të madh për legjitimitetin e vijimësisë së institucioneve pas 18 qershorit”- tha Nishani.
I ftuar në emisionin “Arena” në televizionin Ora News, Nishani tha se maxhoranxha duhet që t’i japë më shumë garanci opozitës dhe duhet që të krijohet klima e dialogut.
Më tej teksa u pyet nga gazetari Hila se a ka informacione Presidenti se mund të manipulohen zgjedhjet siç pretendon opozita, Nishani tha: “Faktet e agresivitetit të krimit të organizuar në Shqipëri janë evidente. Nuk marr përsipër që t’ia atashoj krimin e organizuar si një aktivitet njërës parti politike apo tjetrën”.
Gjithashtu Nishani tha aktiviteti kriminal në Shqipëri është rritur si dhe është bërë pjesë e politikës.
“Ka një aktivitet të shtuar kriminal dhe një evidentim të grupeve kriminale me establishmentin politik. Kam konstatuar edhe nga eksperienca ime e mëparshme si një njeri që ka drejtuar në nivele të larta”- u shpreh Nishani.
Ndërkaq duke folur për zgjedhjet Nishani tha se mund të garojnë vetëm PS dhe LSI më 18 qershor por nuk do të kemi institucione me legjitimet pas zgjedhjeve.
“ Mund të hyjë vetëm PS-ja, vetëm LSI-ja. Nëse opozita nuk hyn në zgjedhje, teknikisht do të kemi zgjedhje, por nuk do të kemi institucione me legjitimet pas zgjedhjeve. Legjitimet edhe institucional. Ka disa standarde ndërkombëtare për legjitimitetin e institucioneve të një vendi që pretendon të jetë demokraci e lirë. Pluralizmi dhe gara e barabartë në zgjedhje. Kushtetuta e Shqipërisë parashikon detyrimisht të drejtën për t’u zgjedhur dhe për të zgjedhur”– tha Nishani.
