Kryetari i PDIU-së Shpëtim Idrizi, deklaroi se po përdoren të gjitha format e influencës të paligjshme për të devijuar vullnetin e njerëzve, madje sipas tij po ushtrohet edhe presion i jashtëzakonshëm tek ato që punojnë në administratë.
Gjatë një interviste në emisionin “5 Pyetjet nga Babaramo”, në Report Tv, Idrizi tha se me 25 prill Edi Rama do të marrë përgjigjen e merituar, pasi kudo që ka shkuar dhe këdo që ka takuar, lajtmotiv është se Shqipëria ka një nevojë për ndryshim thelbësor, pasi sipas tij një njeri ka marrë të gjitha pushtetet.
Idrizi nënvizoi se kryeministri Edi Rama kërkon që të krijojë një klime konfliktuale me bulizmat e tij pasi nuk ka një bilanc për qeverisjen e tij.
”Zoti Rama dhe me bulizmat e tij kërkon që të krijojë një klimë konfliktuale, me atë gjuhë do t’ja kishte zili edhe llaxorja më e madhe e Tiranës. Përdor këtë gjuhë pasi nuk ka një bilanc. Nëse do të shohim talljen dhe denigrimin që u bën jo vetëm figurave të opozitë, por edhe popullit shqiptar, në mungesë të një bilanci për të tonifikuar votuesit e vet për fushatën elektorale, përdor zhargone, fyerje që me thënë drejtën nuk do t’i takonin, jo më një kryeministri, por as edhe një qytetari të zakonshëm. E rëndësishme është që shqiptarëve t’u japim shpresën dhe tu mundësojmë ndryshimin e madh pas 25 prillit. Gjendja që shohim në terren është akoma më e fortë. Sot ka një përdorim masiv për të përdorur të gjitha resurset e pushtetit dhe për të devijuar vullnetin e njerëzve. Rreth 30 mijë qytetarë janë punësuar në administratë vetëm në vitin e fundit. Po shpërndajnë para për këto të tërmetit, po ndajnë legalizime duke përdorur të gjitha format e influencës të paligjshme në fushatë dhe duke ushtruar një presion të jashtëzakonshëm tek ato që janë në punë shteti. Sigurisht që është një fushatë shumë e rëndësishme për Shqipërinë, janë një palë zgjedhje shumë të rëndësishme për tu shkëputur përfundimisht nga një tranzicion i tejzgjatur 30 vjeçar. Kemi thënë në vitet ‘90 ‘E duam Shqipërinë si gjithë Europa’ dhe sot Shqipëri ndodhet në një krizë shumë të madhe ekonomike, politike dhe institucionale. Një krizë ku kemi një largim të madh të rinjsh. Kudo që shkoj dhe këdo që takoj, padyshim që nevoja për ndryshim është lajtmotivi i parë i asaj që kërkojnë qytetarët. Shqipëria ka nevojë për një ndryshim thelbësor, pasi një njeri i vetëm ka marrë të gjitha institucionet dhe ka vënë në pikëpyetje të gjitha ekuilibrat e demokracisë. 500 mijë shqiptarë kanë ikur, gjë që nuk ja kanë bërë as pushtuesit. Kemi një kryeministër arrogant, ku u thotë të rinjve se nuk e duan punën dhe se rrinë në kafe dhe se do të vijë punëtor nga Pakistani dhe Bangladeshi. Ka shumë kusure Edi Rama me shqiptarët e Çamërisë dhe besoj se do të marrë përgjigjen e merituar.”- tha Idrizi.
